काठमाडौं । नेकपा एमालेका अध्यक्ष केपी शर्मा ओलीले लोकतान्त्रिक गणतन्त्र भित्र लोकतान्त्रिक संरचना र संयन्त्र कार्यान्वयन हुनुपर्ने बताउनुभएको छ ।
नेकपा एमालेले सञ्चालन गरेको मध्यपहाडी पुष्पलाल लोकमार्ग समृद्धिका लागि संकल्प यात्राको उपलब्धिका सम्बन्धमा आइतबार पार्टी केन्द्रीय कार्यालयमा आयोजित सञ्चारकर्मीसँगको संवाद कार्यक्रममा बोल्दै अध्यक्ष ओलीले लोकतन्त्र व्यापक प्रणाली र संघीयता त्यसको एउटा पक्ष भएको बताउनुभयो ।
यात्राको क्रममा जनताले लोकतन्त्रको पक्षमा दृढता राखेको पाइएको ओलीको भनाइ छ । ‘ लोकतान्त्रिक व्यवस्थाको विषयमा आजको नेपाली जनता सचेत छ’, ओलीले भन्नुभयो । लोकतन्त्रलाई बलियो र संस्थागत बनाउन सबै लाग्नु पर्नेमा ओलीले जोड दिनुभयो । आफूहरू त्यसमा निरन्तर लागिरहेको उहाँले बताउनुभयो ।
कुनै ठाउँमा नामका विषयमा वा अन्य विषयसँग जोडेर लफडा गरिएको बताउँदै ओलीले त्यस विषयमा बसेर छलफल गर्नुपर्ने बताउनुभयो । राज्यलाई कमजोर बनाउने विभिन्न काम भइरहेको अवस्थामा कसलाई कति शक्ति दिने र शक्तिको बाँडफाँड कसरी गर्ने भन्ने विषयमा छलफल गरेर टुङ्गोमा पुग्नु पर्नेमा ओलीले जोड दिनुभयो ।
शक्ति र श्रोतको बाँडफाँडको सबन्धमा सम्हाल्नै नसक्ने गरी अधिकार दिन नहुने उहाँको सुझाव छ । यस विषयमा सोचेर निर्णय गर्नुपर्ने ओलीले बताउनुभयो । अहिले शिक्षा लगायतको क्षेत्रमा केही समस्या देखिएको उहाँको भनाइ छ ।
