काठमाडौँ । मुलपानी क्रिकेट मैदानको नाम यथावत रहने भएको छ ।
नेपाल क्रिकेट संघले (क्यान)ले सो मैदानको नाम यथावत राख्ने निर्णय गरेको हो । क्यानले मैदानको नाम फेर्दै जयकुमार शाह अन्तर्राष्ट्रिय क्रिकेट मैदान राखेको थियो ।
कागेश्वरी मनोहरा नगरपालिका र स्थानीयको चर्को विवादका कारण क्यानले लगत्तै नाम फेर्ने निर्णय संशोधन गरेको जनाइएको छ । कागेश्वरी मनोहराका प्रमुख उपेन्द्र कार्कीले क्यानले नाम यथावत राख्ने निर्णय गरेको पत्र प्राप्त भएको जानकारी दिएका छन् ।
गत वैशाखमा एसिसी प्रिमियर कपमा हङकङ र सिंगापुरबीचको खेलबाट माथिल्लो मुलपानी क्रिकेट मैदानमा पहिलो पटक अन्तर्राष्ट्रिय खेल भएपछि त्यस मैदानले अन्तर्राष्ट्रिय मान्यता पाएको थियो ।
