काठमाडौँ । सहिद स्मारक ‘ए’ डिभिजन लिग फुटबल अन्तर्गत आज मंगलबार चार खेलहरु हुँदैछन् । दोस्रो लेगको १२ औं चरण अन्तर्गत आज दुई खेल त्रिपुरेश्वरस्थित दशरथ रंगशालामा हुनेछ भने एक–एक खेल च्यासल र एन्फा कम्प्लेक्समा हुनेछ ।
दशरथ रंगशालामा हुने पहिलो खेलमा चर्च ब्वाइज युनाईटेड र थ्री स्टार क्लबबीच प्रतिस्पर्धा हुँदैछ । दुई टोलीबीचको खेल दिउँसो ३ बजे सुरु हुनेछ ।
२४ खेलमा ४४ अंक जोडेर शीर्ष स्थानमा रहेको चर्च ब्वाइजलाई उपाधि जित्न अब मात्र एक अंकको आवश्यकता रहेको छ । अर्कोतर्फ २४ खेलमा २८ अंकसहित १२ औं स्थानमा रहेको थ्री स्टारलाई रेलिगेसनबाट बच्न आजको खेलमा जितको नतिजा महत्वपूर्ण रहेको छ ।
यस्तै, दशरथ रंगशालामा हुने दोस्रो खेलमा सातदोबाटो युथ क्लब र जावलाखेल युथ क्लबबीच प्रतिस्पर्धा हुँदैछ । दुई टोलीबीचको खेल साँझ ६ बजे सुरु हुनेछ ।
सातदोबाटो २४ खेलमा ३२ अंक जोडेर पाँचौं स्थानमा रहेको छ भने जावलाखेल २४ खेलमा ३७ अंक जोडेर तेस्रो स्थानमा रहेको छ । यस्तै च्यासल मैदानमा एफसी खुमलटार र एपीएफ क्लबबीच प्रतिस्पर्धा हुनेछ । दुई टोलीबीचको खेल दिउँसो ३ बजे सुरु हुनेछ ।
खुमलटार २४ खेलमा २४ अंक जोडेर पुछारमा रहेको छ भने एपीएफ २४ खेलमा ३० अंक जोडेर नवौं स्थानमा रहेको छ । यस्तै, एन्फा कम्प्लेक्समा त्रिभुवन आर्मी क्लब र नेपाल पुलिस क्लबबीच दिउँसो ३ बजे खेल हुँदैछ ।
आर्मी २४ खेलमा ३० अंक जोडेर आठौं स्थानमा रहँदा पुलिस २४ खेलमा ३७ अंक जोडेर चौंथो स्थानमा रहेको छ ।
