काठमाडौं । राष्ट्रिय क्रिकेट टिमका स्पिनर सन्दीप लामिछानेलाई विश्वकप छनोट अभ्यास खेलमा सहभागी नगराउने उनको लिगल टीमले निर्णय गरेको छ ।
मुद्दा सुनुवाईमा ढिलाई भएका कारण दक्षिण अफ्रिकामा हुने अभ्यास खेलमा उनी नजाने निर्णय भएको सन्दीपका कानून व्यवसायी सरोज घिमिरेले जानकारी दिए ।
सन्दीपको जिम्बावे भ्रमणबारेमा पनि अझै निर्णय भइनसकेको घिमिरेले बताए । उनले भने, ‘मुद्दाको टुंगो नलगाई उनी नजाने हाम्रो लिगल टिमको निर्णय भयो । जिम्बावे भ्रमणबारे अझै केही निर्णय भइसकेको छैन’।
नेपालले आगामि जुन जुलाईमा विश्वकप छनोटको लागि जिम्बावे भ्रमण गर्दैछ । सन्दीपविरुद्ध लागेको नाबलिक बलात्कारको आरोपको फैसला सुनुवाई हुननसक्दा उनी भ्रमणमा सहभागि हुने नहुने भन्नेबारे अझै निर्णय हुनसकेको छैन ।
मंगलबारका लागि पेशी तोकिएपनि पीडित भनिएकी किशोरीले क्षतिपूर्ति पाउनुपर्ने माग राखी निवेदन दिएकाले त्यसको निर्णयपछि मात्र फैसला सुनुवाई हुने भएको छ। न्यायाधीश शंकरबहादुर राईको इजलासमा आजलाई उक्त पेसी तोकिए पनि सुनुवाइ नगरिएको हो ।
