काठमाडौँ । नेकपा (एमाले)का अध्यक्ष केपी शर्मा ओलीले अरु पार्टीहरु क्षणिक दैनिक फोहोरी खेलमा लागेको बताउनुभएको छ ।
नेकपा एमाले निकट खेलकुद महासंघका नवनिर्वाचित पदाधिकारीहरुको शपथग्रहण कार्यक्रममा उहाँले आफूहरु त्यस्तो फोहरी खेलमा सहभागी नहुने बताउनुभयो
उहाँले भन्नुभयो, “हामी अरु पार्टीजस्तो क्षणिक दैनिक फोहारी खेलमा सामेल छैनौँ, सामेल हुँदैनौँ ।” एमाले देश बनाउन लागेको र देश बनाएपछि मात्र विश्राम लिने उहाँको भनाइ थियो । आफूहरु म्याराथन दौडमा रहेको भन्दै एमाले लामो दौडको घोडा भएको उल्लेख गर्नुभयो ।
“सिल्भर तातेजस्तो हामी तात्दैनौँ, यसो ताप पायो तातिहाल्यो, भुईंमा राख्यो एकैछिनमा सेलाइहाल्यो”, अध्यक्ष ओलीले भन्नुभयो, “हामी अर्बौं वर्ष खर्बौं वर्ष तातेपछि सूर्य तातेजस्तै जस्तो तात्नु पर्छ, एमाले त्यस्तै हो ।” छिटो पनि नगरी, हतार पनि नगरी, योजनाबद्ध ढंगले अघि बढ्नु पर्ने उहाँको भनाइ थियो ।
