काठमाडौं । जर्मनीको प्रतिनिधि सभा जर्मन बुन्डेस्ट्यागबाट दक्षिण एसियाली संसदीय प्रतिनिधिमण्डल, ७ देखि १० फाल्गुन २०७९ (१९ देखि २२ फेब्रुअरी २०२३), सम्म नेपालको चारदिने औपचारिक भ्रमणमामा आएको छ।
छ सदस्यीय संसदीय प्रतिनिधिमण्डलमा सांसद सुश्री रेनाटे कुनास्ट, श्री एन्ड्रियास लारेम, श्री पॉल लेह्रिडर, सुश्री रिया श्रोडर, डा। माल्टे काउफम्यान र डा. आन्द्रे हान रहेका छन् ।
“महामारीपछिको यो भ्रमणले नेपाल र जर्मनीबीचको संसदीय सम्बन्धलाई थप सुदृढ बनाउँदै ६० वर्षभन्दा लामो समयदेखिको द्विपक्षीय मित्रता र सहयोगलाई थप बलियो बनाउनेछ,” प्रतिनिधिमण्डलका प्रमुख रेनाट कुनास्टले भनिन्।
प्रतिनिधिमण्डलले नेपालको आर्थिक रुपान्तरण, पर्यटन प्रवद्र्धन, नेपालको शान्ति प्रक्रिया र मानवअधिकार, महिला सशक्तिकरण, नियममा आधारित अन्तर्राष्ट्रिय व्यवस्था, कृषि र क्षेत्रीय सहयोगका साथै जर्मन–नेपाल विकास सहयोगलगायतका विषयमा छलफल गर्नेछ ।
प्रतिनिधिमण्डलका सदस्यहरुले नेपालका सम्माननीय प्रधानमन्त्री पुष्पकमल दाहाल, प्रतिनिधिसभाका सम्माननीय सभामुख देवराज घिमिरे, माननीय उपप्रधानमन्त्री तथा अर्थमन्त्री विष्णु पौडेल, माननीय कृषि तथा पशुपन्छी विकासमन्त्री ज्वालाकुमारी साह र पररास्ट्र सचिव भरत राज पौड्यालसँग भेटघाट गर्नुभयो। जर्मन संसदीय प्रतिनिधिमण्डलले नेपालको संघीय संसदका सदस्यहरुसँग पनि अन्तरक्रिया गर्नुभयो।
औपचारिक भेटघाटका साथै संसदीय प्रतिनिधिमण्डलले जर्मन विकास सहयोग, नेपालमा कार्यरत जर्मन गैरसरकारी संस्था र मानवअधिकार संगठनका प्रतिनिधिसँग पनि अन्तरक्रिया गर्नेछ। प्रतिनिधिमण्डलले इसिमोड ,नलेज पार्क, नेपाल व्यावसायिक प्रतिष्ठान र नेपाल सीप तथा तालिम सचिवालय को पनि भ्रमण गर्ने योजना बनाएको छ। चारदिने नेपाल भ्रमणका क्रममा संसदीय प्रतिनिधिमण्डलले भक्तपुर र बौद्धनाथ स्थित सांस्कृतिक सम्पदाको पनि भ्रमण गर्ने योजना रहेकोछ।
