काठमाडौँ । प्रतिनिधिसभाको सभामुख पदका लागि नेपाली कांग्रेसका नेत्री ईश्वरीदेवी न्यौपानेले मनोनयन दर्ता गराएकी छन् । नयाँ बानेश्वरस्थित सङ्घीय संसद् भवनको ल्होत्से हलमा व्यवस्था गरिएको निर्वाचन अधिकृतकको कार्यालय पुगेर उनले मनोनयन दर्ता गराएकी हुन् ।
सभामुख पदमा मनोनयन दर्ता गरेपछि सांसद न्यौपानेले आफूले सभामुख जित्ने प्रतिक्रिया दिएकी छन् । उनले बुधबार अपरान्ह नयाँ बानेश्वरस्थित संसद भवनमा पत्रकारहरूसँग संक्षिप्त कुराकानी गर्दै सभामुखको चुनाव जित्ने बताइन् ।
‘म प्रजातान्त्रिक प्रणालीमा विश्वास गर्छु। चुनावमा हार र जित त हुन्छ नै,’ उनले भनिन्, ‘सांसदहरूले दिने मतकै आधारमा सभामुख जित्छु ।’
उनको प्रस्तावकमा पार्टीका महामन्त्री विश्वप्रकाश शर्मा र समर्थकमा नेकपा (एकीकृत समाजवादी)का नेता प्रकाश ज्वाला छन् । उनको जन्म २०१६ सालमा दाङमा भएको थियो । उनी समानुपातिक निर्वाचन प्रणालीबाट सांसद निर्वाचित भएकी हुन् ।
प्रतिनिधि सभामा कांग्रेसका ८९, एकीकृत समाजवादीका १०, जसपाका १२ र लोसपाका ४ जना सांसद छन् । कांग्रेस सभापति शेरबहादुर देउवाले सरकारलाई विश्वासको मत दिएका तर सरकारमा सहभागी नभएका दलहरूको समर्थन जुटाएर सभामुखमा न्यौपानेलाई अघि सारेका छन् ।
यसअघि आजै सभामुख पदका लागि सत्ता साझेदार दलका तर्फबाट नेकपा (एमाले)का सांसद देवराज घिमिरेले पनि मनोनय दर्ता गराएका छन् । प्रतिनिधिसभाका सभामुखको निर्वाचन यही माघ ५ गते बिहान ११ बजे हुँदैछ । उक्त बैठकमा सभामुख पदमा निर्वाचित गरियोस् भनी प्रस्तावकले प्रस्ताव र समर्थकले समर्थन गर्ने कार्यतालिका छ ।
त्यसलगत्तै उम्मेदवारीको सूचनामाथिको सामूहिक रुपमा छलफल हुने र दर्ता क्रमानुसार निर्णयार्थ प्रस्तुत गरिनेछ । प्रतिनिधिसभाको गत पुस २६ गतेको बैठकले माघ ५ गते सभामुखको निर्वाचन गर्न आज निर्वाचन तालिका प्रकाशित गर्न निर्देशन दिएको थियो ।
सङ्घीय संसद्को पहिलो बैठक बसेको १५ दिनभित्र प्रतिनिधिसभाका सदस्यमध्येबाट सभामुख निर्वाचित गर्ने संवैधानिक व्यवस्था छ ।
