काठमाडौं: लागुऔषध नियन्त्रण ब्यूरो, कोटेश्वर तथा मातहतका कार्यालयबाट खटिएको प्रहरी टोलीले लागुऔषध मुद्दामा फरार रहेका तीन जनालाई पक्राउ गरेको छ।
प्रहरीका अनुसार सिरहाको मिर्चैया नगरपालिका–५ बाट पक्राउ परेका २५ वर्षीय किसन साह जेन-जी आन्दोलनका क्रममा प्रहरी हिरासत कक्षबाट भागेका थिए। उनी लागुऔषध मुद्दामा अनुसन्धानका क्रममा हिरासतमा रहेका थिए। साहलाई पक्राउ गरी आवश्यक कारबाहीका लागि प्रहरी वृत्त बानेश्वरमा बुझाइएको छ।
त्यसैगरी, महेन्द्रनगरस्थित लागुऔषध नियन्त्रण ब्यूरोको शाखा कार्यालयबाट खटिएको प्रहरी टोलीले कञ्चनपुरको भीमदत्त नगरपालिका–५ का २८ वर्षीय विक्रम सिंह नायक लाई पक्राउ गरेको छ। जिल्ला अदालत कञ्चनपुरबाट लागुऔषध मुद्दामा एक वर्ष कैद सजाय तोकिएपछि उनी फरार रहेका थिए। पक्राउ परेका नायकलाई जिल्ला कारागार कञ्चनपुर पठाइएको प्रहरीले जनाएको छ।
यस्तै, सुर्खेतस्थित लागुऔषध नियन्त्रण ब्यूरोको शाखा कार्यालयबाट खटिएको प्रहरी टोलीले वीरेन्द्रनगर नगरपालिका–११ का २३ वर्षीय अर्जुन बादीलाई पक्राउ गरेको छ। जिल्ला अदालत सुर्खेतबाट लागुऔषध मुद्दामा एक महिना १५ दिन कैद सजाय तोकिएपछि उनी फरार रहेका थिए। उनलाई पक्राउ गरी जिल्ला कारागार सुर्खेत बुझाइएको प्रहरीले जनाएको छ।
प्रहरीले लागुऔषध मुद्दामा फरार रहेका व्यक्तिहरूको खोजी तथा पक्राउ अभियानलाई निरन्तरता दिइरहेको जनाएको छ।
