काठमाडौं । अफ्रिकी राष्ट्र केप भर्डले आफ्नो देशको राष्ट्रिय रंगशाला विश्व फुटबलका लेजेण्ड पेलेको नाममा नामाकरण गरेको छ ।
केप भर्डका प्रधानमन्त्री सिल्भाले राष्ट्रिय रंगशाला ‘स्टाडियो नेसनल डी काबो भर्ड’ को नाम पेलेको नाममा नामाकरण गरिएको बताएका छन् । नामाकरणपछि उक्त रंगशालाको नाम ‘पेले स्टेडियम’ राखिएको छ ।
१५ हजार दर्शक क्षमताको उक्त रंगशाला केप भर्डको राजधानी प्राइया नजिकै रहेको छ ।
फिफा अध्यक्ष जियानी इनफान्टिनोले हरेक देशले पेलेको स्मृतिमा एक रंगशालाको नाम पेलेको नाममा राख्नु पर्ने धारणा व्यब्त गरेका थिए ।
विश्व फुटबलकै लेजेन्ड ब्राजिलियन फुटबलर पेलेको ८२ वर्षको उमेरमा गत हप्ता निधन भएको थियो ।
उनले ब्राजिललाई सन् १९५८, १९६२ र १९७० मा गरी तीन पटक फिफा विश्वकपको उपाधि दिलाएका थिए । तीन पटक विश्वकप उपाधि जित्ने पेले एकमात्र खेलाडी समेत हुन् ।
सन् २००० मा पेलेलाई फिफा प्लेयर अफ द सेन्चुरी घोषणा गरिएको थियो । पेलेले ब्राजिलका लागि ९२ खेलमा ७७ गोल गरेका छन् ।
पेलेले आफ्नो २१ वर्षे फुटबल करियरमा कीर्तिमानी १ हजार ३६३ खेलमा १ हजार २८१ गोल गरेका थिए ।
