एजेन्सी । पाकिस्तानका पूर्वप्रधानमन्त्री इमरान खानको अवस्था अहिले स्थिर रहेको छ । उनको शल्यक्रिया डेढ घण्टा चलेको थियो ।
खुट्टामा अड्किएको गोलीका केही टुक्रा थिए, जसलाई निकालिएको छ । अस्पतालका चिकित्सक फैसल सुल्तानका अनुसार गोली लागेर उनको खुट्टाको ‘टिबिया’ दाहिने तर्फबाट काटिएको छ ।
अर्कोतर्फ, आक्रमणको विरोधमा देशभर विरोध प्रदर्शन भइरहेको छ। बिहीबार अबेर राति, पार्टी पाकिस्तान तहरीक–ए–इन्साफ (पीटीआई) का उग्र प्रदर्शनकारीहरू सडक जाम गरेर प्रदर्शन गरेका थिए । धेरै ठाउँमा आगजनी र नाराबाजी समेत भएको थियो । उनको पार्टीले आज पाकिस्तान बन्दको घोषणा गरेको छ ।
बिहीबार गुजरनवालामा लङ मार्चका क्रममा खानमाथि भएको आक्रमणमा सांसद फैसल जावेदसहित १३ जना घाइते भएका थिए । एक जनाको मृत्यु भएको छ । आक्रमणपछि इमरानले ‘अल्लाह’ले आफूलाई नयाँ जीवन दिएको बताएका छन् । ‘इन्शाअल्लाह हामी फेरि फर्कनेछौं र हाम्रो लडाई जारी राख्नेछौं।’ उनले भने ।
इमरानले अक्टोबर २८ मा शाहबाज शरीफ सरकारको राजीनामा र तत्काल आम निर्वाचनको माग गर्दै लङ मार्च सुरु गरेका थिए । यो लङ मार्चको शुरुवातदेखि नै विभिन्न कारणले महिला पत्रकारसहित तीन जनाको मृत्यु भइसकेको छ ।
मे महिनामा पनि इमरानले लङ मार्च निकालेका थिए र त्यस क्रममा चरम हिंसा भएको थियो । इमरान खानको पदयात्रा बिहीबार गुजरानवाला पुगेको थियो । यहाँ उनीहरु जुलुसमा थिए । उनीहरु केही नेताहरुलाई कन्टेनरको छतमा अभिवादन गर्दै अगाडि बढिरहेका थिए । त्यसपछि साँझ एक व्यक्तिले उनीमाथि गोली प्रहार गरे ।
