काठमाडौँ । काठमाडौँ खानेपानी लिमिटेड (केयुकेएल) का प्रमुख कार्यकारी अधिकृत (सिईओ) मिलनकुमार शाक्यको राजीनामा माग्दै उनको कार्यकक्षमा तालाबन्दी गरिएको छ ।
सिईओ शाक्यको कार्यसम्पादन कमजोर भएको भन्दै काठमाडौँ उपत्यका खानेपानी लिमिटेड स्वतन्त्र कर्मचारी संघ र काठमाडौँ उपत्यका खानेपानी लिमिटेड लोकतान्त्रिक कर्मचारी संघले सिईओको कार्यकक्षमा तालाबन्दी गरेका हुन् । उनीहरुले सिईओ शाक्यको राजीनामासमेत माग गरेका छन् ।
यद्यपि अन्य कर्मचारी संगठनले तालाबन्दीप्रति असहमति प्रकट गरेका छन् । काठमाडौँ उपत्यका खानेपानी लिमिटेड कर्मचारी संगठनले एक विज्ञप्ति जारी गरी परिस्थितिको गम्भीरतालाई खानेपानी जस्तो अत्यावश्यकीय सेवा प्रवाह गरिरहेको कम्पनीको प्रमुख कार्यकारी अधिकृतको कार्यकक्षमा भएको तालाबन्दीप्रति असहमति जनाएको हो ।
संगठनले तत्काल ताला खोलेर वार्ता संवादको विधि र प्रक्रिायबाट समस्याको समधान खोज्न माग गरेको छ । सरकार र राजनीतिक दलहरु आमनिर्वाचनको पूर्वतयारीमा होमिएको र दशैँ नजिकै आएको अवस्थामा खानेपानी उत्पादन, प्रशोधन र वितरण गर्नु सबै ट्रेड युनियनकर्मी र कर्मचारीको कर्तव्य र जिम्मेवारी भएको संगठनको भनाइ छ ।
उसले नेपाल सरकारले अत्यावश्यकीय वस्तु र सेवामा बन्द, हड्ताल, तालाबन्दी गर्न नपाउने भनी जारी गरेको आदेशपालना गर्दै आम उपभोक्ता वर्गलाई निर्वाधरुपमा खानेपानी सेवा प्रवाह गर्नु कम्पनीको घोषित लक्ष्य र उद्देश्य भएको स्मरण गराएको छ ।
मेलम्ची आयोजनाबाट दिगोरुपमा खानेपानी आपूर्ति हुन समय लाग्ने अवस्था देखिएको, २०७० सालदेखि खानेपानीको महसुल वृद्धि नभएको र तत्काल मूल्य समायोजन हुने अवस्था नरहेको, नेपाल सरकारले आव २०७९ साल साउन महिनादेखि वृद्धि गरेको कर्मचारीको तलब स्केलले थप दायित्व सिर्जना भएको र सरकारबाट सञ्चालन अनुदान प्राप्त नभएको अवस्था सबैमा अवगत नै छ भन्दै संगठनले भनेको छ, “आगामी दिनमा कम्पनीले आर्थिक संकटको कारणले खानेपानी सेवा प्रवाह सहजरुपमा गर्न नसक्ने जटिल अवस्था आउने देखिन्छ ।
भविष्यमा आउने विषम परिस्थितिको आकलन गर्दै काठमाडौँ उपत्यका खानेपानी लिमिटेडको प्रशासनिक, आर्थिक, प्राविधिक र व्यवस्थापकीय क्षेत्रमा आमूल सुधारका लागि अधिकतम प्रयास गर्ने वा संरचनागत परिवर्तनका लागि काठमाडौँ उपत्यका खानेपानी व्यवस्थापन बोर्डबाटै उपत्यकाको समग्र खानेपानी तथा सरसफाई व्यवस्थापन गर्ने विकल्प रोज्ने ?”
