काठमाडौँ । निलम्बित प्रधानन्यायाधीश चोलेन्द्रशम्शेर जबराविरुद्धको महाअभियोगमाथि अध्ययन सुरु हुने भएको छ । महाअभियोग सिफारिस समितिका अनुसार निलम्बित प्रधानन्यायाधीश जबराविरुद्धको महाअभियोगमाथि शुक्रबार अध्ययन सुरु हुने भएको हो । उपत्यका बाहिर रहेका समितिका सदस्यहरु काठमाडौँ फर्किसकेकाले अब अध्ययन सुरु हुने भएको हो ।
गत फागुन १ गते जबराविरुद्ध महाअभियोग दर्ता भएको थियो । उनीविरुद्ध २१ वटा आरोप लगाइएको थियो । नेकपा (माओवादी केन्द्र) का प्रमुख सचेतक देवप्रसाद गुरुङ, नेपाली कांग्रेसकी तत्कालीन सचेतक पुष्पा भुसाल र नेकपा (एकीकृत समाजवादी) का तत्कालीन प्रमुख सचेतक जीवनराम श्रेष्ठ प्रस्तावक भई जबराविरुद्ध प्रतिनिधिसभामा महाअभियोग दर्ता गरिएको थियो ।
प्रतिनिधिसभाले महाअभियोग प्रस्ताव दर्ता भएपछि फागुन २२ गते संविधानअनुसार महाअभियोग सिफारिस समिति बनाएको थियो भने फागुन २९ गते प्रतिनिधिसभामा पेस भएको उक्त प्रस्तावमाथि यही साउन २२ गते सैद्धान्तिक छलफल गरेर महाअभियोग सिफारिस समितिमा पठाएको थियो ।
एघार सदस्यीय महाभियोग सिफारिस समितिमा एकवाल मियाँ, कल्याणीकुमारी खड्का, कृष्णभक्त पोखरेल, प्रमोद साह, मीनबहादुर विश्वकर्मा, यशोदा गुरुङ सुवेदी, रामबहादुर विष्ट, रेखा शर्मा, लालबाबु पण्डित, विष्णुप्रसाद पौडेल र डा. शिवमाया तुम्बाहाङ्फे सदस्य हुनुहुन्छ ।
