वासिङटनः अमेरिकी राष्ट्रपति जो बाइडेनलाई कोरोनाभाइरस संक्रमण भएको पुष्टि भएको छ ।
अमेरिकी राष्ट्रपतिको कार्यालयले एक विज्ञप्ति जारी गर्दै राष्ट्रपति बाइडेनलाई कोभिडको सामान्य लक्षण देखिएको र उहाँ स्वस्थ रहनु भएको जनाएको छ । यसअघि नै राष्ट्रपति बाइडेनले खोपको पूरा मात्रा लगाइसक्नु भएको छ । हाल उहाँलाई पाक्सलोभिड नामको औषधि दिइएको पनि राष्ट्रपति कार्यालयले जनाएको छ ।
बाइडेनलाई राष्ट्रपति कार्यालयमै आइसोलेसनमा राखिएको र परीक्षणमा नेगेटिभ आएपछि मात्र व्यक्तिगत भेटघाटमा रहनु हुनेछ । तर उहाँले राष्ट्रपति कार्यालयबाटै यसअघि तय भएका भेटघाटलाई जुम मार्फत संवाद गर्नु हुनेछ ।
यसअघि राष्ट्रपति बाइडेनको मंगलबार कोरोना परीक्षण गरिएको थियो, र त्यस परीक्षणमा उहाँमा कोरोनाको संक्रमण देखिएको थिएन । तर बिहीबार गरिएको परीक्षणमा उहाँमा कोरोना पुष्टि भएको थियो ।
भारतीय प्रधानमन्त्री समेत विश्वका नेताहरुले राष्ट्रपति बाइडेनको शीघ्र स्वास्थ्य लाभको कामना गर्नु भएको छ । (एएनआई)
