काठमाडौं । पाकिस्तान स्वतन्त्र भएको ७५औँ वार्षिकोत्सवका अवसरमा नेपालस्थित पाकिस्तानी राजदूतावासले शुक्रबार ‘पाकिस्तान ल्याण्ड अफ एडभेन्चर एन्ड नेचर’ कार्यक्रमको आयोजना गरेको छ ।
कार्यक्रममा कूटनीतिक समुदाय, सेवारत तथा अवकाशप्राप्त सरकारी अधिकारी, बुद्धिजीवी, पत्रकार, लेखक, विश्लेषकलगायत समाजका विभिन्न तहका व्यक्तिहरुको सहभागिता रहेको दूतावासले जनाएको छ ।
होटल याक एण्ड यति, दरबारमार्गमा भएको सो कार्यक्रमको उद्देश्य पाकिस्तानी संस्कृतिलाई उजागर गर्नु र विशेषगरी नेपाल र पाकिस्तानबीचको मैत्रीपूर्ण सम्बन्धलाई सुदृढ पार्नु रहेको जनाइएको छ ।
कार्यक्रमलाई सम्बोधन गर्दै नेपालका लागि पाकिस्तानी राजदूत सैयद हैदर शाहले नेपाल र पाकिस्तानबीचको ऐतिहासिक, सांस्कृतिक, धार्मिक र परम्परागत सम्बन्धबारे प्रकाश पार्नुभएको थियो ।
