बर्दिया । बर्दियाको राजापुर नगरपालिकाले विभिन्न राजनीतिक दलमा संलग्न रही सक्रियरुपमा राजनीतिक दलको कार्यकारिणी पदमा रहने शिक्षकहरुलाई उल्लेखित पदबाट राजीनामा दिन लगाउन पालिकाभित्रका सम्पूर्ण सामुदायिक विद्यालयलाई निर्देशन दिएको छ ।
नवनिर्वाचित नगरप्रमुख दिपेश थारुले पालिकाभित्रका सम्पूर्ण सामुदायिक विद्यालयलाई पत्र पठाई प्रचलित शिक्षा ऐन, २०२८ (संशोधनसहित) को दफा १६ (ङ) को उपदफा ५ को (छ) मा उल्लेखित व्यवस्था उल्लंघन गरी वभिन्न राजनीतिक दलमा संलग्न रही सक्रियरुपमा राजनीतिक दलको कार्यकारिणी पदमा रहने शिक्षकहरुलाई उल्लेखित पदबाट राजीनामा दिन लगाई त्यसको विवरण सात दिनभित्र नगरपालिका कार्यालयमा पेश गर्न निर्देशन दिएका हुन् ।
उनले पत्रमा शिक्षकहरुको यस्ता गतिविधिले विद्यालयको पठनपाठनमा प्रभावित हुने गरी आचरण विपरीत कार्य भएको उल्लेख गरेका छन् ।
