काठमाडौँ । काठमाडौँ महानगरपालिकको उपप्रमुख पदमा नेकपा (एमाले) की सुनिता डंगोलको जित सुनिश्चित भएको छ । महानगरपालिकाको मत गणना सम्पन्न नहुँदै उनको जित सुनिश्चित भएको हो ।
महानगरपालिकामा अहिलेसम्म एक लाख ६६ हजार ३१३ मत गणना भइसकेको छ । डंगोलले ६० हजार ६७५ मत ल्याइसकेकी छन् । उनका निकटतम प्रतिद्वन्द्वी नकेपा (एकीकृत समाजवादी) का रामेश्वर श्रेष्ठले २० हजार ६८६ मत मात्र प्राप्त गरेका छन् ।
अहिलेसम्मको मतगणनामा डंगोल श्रेष्ठभन्दा ३९ हजार ९८९ मतले अगाडि छन् । अब महानगरमा २४ हजार ७७८ मत गणना गर्न बाँकी छ । त्यसैले डंगोलको जित सुनिश्चित भएको हो ।
यस्तै महानगरको प्रमुख पदमा स्वतन्त्र उम्मेदवार बालेन्द्र साह पनि जितको नजिक पुगेका छन् । उनले ५४ हजार २१३ मत प्राप्त गरेका छन् । उनका निकटतम प्रतिद्वन्द्वी सत्ता गठबन्धनबाट नेपाली कांग्रेसकी उम्मेदवार सिर्जना सिंहले ३४ हजार १८० मत ल्याएकी छन् ।
त्यसैगरी एमालेका केशव स्थापितले ३३ हजार ६०९ मत प्राप्त गरेका छन् । साहले सिंहसँग २० हजार ३३ मतले अग्रता कायम गरेका छन् ।
