रौतहट । मधेश प्रदेशका प्रदेशसभा सदस्यबाट राजीनामा दिएर स्थानीय तहमा उम्मेदवारी दिएका शेख अबुकलाम आजाद पराजित भएका छन् ।
रौतहटको गढीमाई नगरपालिकाको प्रमुख पदमा उम्मेदवारी दिएका प्रदेशसभा सदस्य आजाद पराजित भएका हुन् । उनले प्रदेशसभाबाट राजीनामा दिएर जनता समाजवादी पार्टी (जसपा)का तर्फबाट सो नगरपालिकामा प्रमुख पदका लागि उम्मेदवारी दिएका थिए ।
उनलाई नेपाली कांग्रेसका प्रमुख पदका उम्मेदवार श्यामप्रसाद यादवले पराजित गरे । यादव दोस्रो कार्यकालका लागि निर्वाचित भएका हुन् । यादवले आठ हजार ६३१ मत ल्याए भने उनका निकटतम प्रतिद्वन्द्वी आजादले आठ हजार ७३ मत हासिल गरे ।
सो नगरका लागि उपप्रमुख पदमा जसपाकी स्मिताकुमारी यादव निर्वाचित भएकी छन् । उनले छ हजार ६७१ मत हासिल गरिन् । उनका निकटतम प्रतिस्पर्धी नेकपा (एकीकृत समाजवादी) का नागेन्द्र सिंहले पाँच हजार ९२ मत प्राप्त गरे ।
आजाद मधेश प्रदेश सरकारको विकास समितिको सभापतिसमेत थिए ।
