भरतपुर महानगरपालिकामा झन्डै एक घन्टा अघिदेखि मतगणना रोकिएको छ । मतगणना गर्ने क्रममा गठबन्धन र एमालेका प्रतिनिधिबीच सदर, बदर मतमा विवाद भएपछि मतगणना रोकिएको निर्वाचन कार्यालयले जनाएको छ ।
कार्यालयका अनुसार सर्वपक्षीय बैठक बसेर मत गणना पुनः सुरु गर्ने तयारी भइरहेको छ ।
मतपत्रमा छाप संकेतका आधारमा सदर वा बदर के गर्ने भन्नेबारे दलका प्रतिनिधिले आपत्ति जनाएपछि आइतबार पनि भरतपुर मतगणना स्थगित भएको थियो ।
पछिल्लो परिणामअनुसार यहाँ नेपाल कम्युनिष्ट पार्टी (माओवादी केन्द्र) की उम्मेदवार रेनु दाहाल ५,३८२ मतका साथ अग्रस्थानमा हुनुहुन्छ । नेपाल कम्युनिष्ट पार्टी एमालेका विजय सुवेदीले ५ हजार ३६७ मत ल्याएर दाहाललाई पछ्याइरहनु भएको छ ।
दुवै उम्मेदवारबीच यस पटक पनि अत्यन्त झिनो मतान्तर रहेकाले पनि भरतपुर महानगरको मतगणनालाई निकै संवेदनशील मानिएको छ ।
