रुपन्देही । रुपन्देहीको शुद्धोधन गाउँपालिका वडा नं. १ मा मतगणना प्रतिनिधी र कर्मचारीको विवरण फरक परेको भन्द काँग्रेसका उम्मेदवार जंगबहादुर यादव पक्षले पुनः मतगणनाको माग गरेका छन् ।
शनिबार बेलुका सम्पन्न मतगणनाको वास्तविक तथ्यांक फेरबदल गरी कर्मचारीले जितेको उम्मेदवारलाई १ मतले पराजित घोषणा गरेको भन्दै पुन मतगणनाको माग गरिएको हो ।
काँग्रेसका तर्फबाट मतगणनामा बसेका प्रतिनिधि दिलीप यादवका अनुसार मतगणना सकिँदा जनता समाजवादीका उम्मेदवार बाबुराम गडरियाको ९८७ मत र काँग्रेसका जंगबहादुर यादवको ९८८ मत थियो । सोही अनुसार काँग्रेस उम्मेदवार विजयी भएको भन्दै विजय जुलुसको तयारी समेत गरियो ।
तर केहीबेरपछि मतगणनामा खटिएका कर्मचारीले कम्युटर प्रिण्ट गरेको कागजमा गडरियाको ९९२ र यादवको ९९१ मत रहेको विवरण सार्वजनिक गरे । त्यसपछि भने विजेता भनेर विजयजुलुसको तयारी गरेका काँग्रेस कार्यकर्ता निराश भए ।
कर्मचारीले प्रिण्ट गर्ने बेला झुटो तथ्यांक राखेर प्रिष्ट गरेको काँग्रेस पक्षको आरोप छ । ‘पहिला ९८७ र ९८८ मत कर्मचारीले प्रिण्ट गर्ने बेलामा ९१ र ९२ कसरी भयो रु’, काँग्रेस उम्मेदवार यादवका भाई सूर्यमान यादव भन्छन्, ‘पहिला जोड्दा हामी अगाडी थियौँ, तर निर्वाचनका कर्मचारीले उनीहरुलाई एकमतले जितायो र घोषणा पनि गरिहाल्यो ।’
काँग्रेस उम्मेदवार पक्षले बदर मतको विवरण माग्दा समेत नदिएको यादवको गुनासो गरे । ‘उम्मेदवार र उम्मेदवारका प्रतिनिधिले माग्दा बदर मतको विवरण त दिनुपर्ने हो’, उनले भने ‘तर दिँदैनन, हाम्रै मान्छे मिलेका छन् ।’
