काठमाडाैंः भारतीय प्रधानमन्त्री नरेन्द्र मोदी सोमबार भगवान गौतमबुद्धको जन्मस्थल लुम्बिनी भ्रमणका लागि आउँदै हुनुहुन्छ । बुद्ध जयन्तीको अवसर पारेर नेपाल आउन लाग्नुभएका मोदीको भ्रमण कार्यतालिकालाई दुबै मुलुकका अधिकारीहरुले अन्तिम रुप दिएका छन् ।
प्राप्त विवरण अनुसार, भारतको कुशीनगर विमानस्थलबाट हेलिकप्टर मार्फत नेपाल आउने भारतीय प्रधानमन्त्री मोदीले नेपालमा पाँच घण्टा व्यतित गर्नु हुनेछ । उहाँ बिहान पौने ११ बजे लुम्बिनी आइपुग्नु हुनेछ ।
सोमबार पौने ११ बजे उहाँ अन्तर्राष्ट्रिय बौद्ध सम्मेलन तथा ध्यान केन्द्रको हेलिप्याडमा ओर्लनु हुनेछ । भारतीय प्रधानमन्त्री मोदीसँग परराष्ट्रमन्त्री डा नारायण खड्काले भेट गर्नु हुनेछ ।
त्यसपछि उहाँ मायादेवी मन्दिर परिसरमा पूजापाठको निम्ति ११ बजे पुग्ने कार्यक्रम छ । त्यहाँ उहाँले आधा घण्टा बिताउनु हुनेछ ।
मायादेवी मन्दिरमा पूजापाठ गरेपछि उहाँ साढे ११ बजे भारतले निर्माण गरेको बौद्ध गुम्बामा प्रवेश गर्ने कार्यक्रम छ । त्यहाँ प्रधानमन्त्री मोदीले झण्डै ४० मिनेट बिताउनुहुने बताइएको छ । यहाँ प्रधानमन्त्री मोदीले सम्बोधन गर्नु हुनेछ ।
सवा १२ बजेतिर उहाँ र भारतीय टोली नजिकैको होटल पवन प्यालेसतर्फ प्रस्थान गर्नेछ । पवन प्यालेसमा प्रधानमन्त्री शेरबहादुर देउवाले भारतीय समकक्षीको सम्मानमा दिवाभोज आयोजना गर्नु हुनेछ ।
त्यसमा झण्डै एक घण्टा बिताएपछि भारतीय प्रधानमन्त्रीले केहीबेर सोही होटलमा आराम गर्नु हुनेछ । त्यसपछि उहाँ साढे ३ बजे पुनः अन्तर्राष्ट्रिय बौद्ध सम्मेलन तथा ध्यान केन्द्रको सभाहलमा आयोजना हुने अन्तिम कार्यक्रममा सरिक भएर हेलिकप्टरबाट स्वदेश फर्कनु हुनेछ ।
दुबै देशका प्रधानमन्त्री बीच औपचारिक वार्ता हुने भए पनि कुनै सम्झौता हुने वा नहुने प्रष्ट भइसकेको छैन ।
