आफूले मात्र जित्ने सपना नदेखौँ, टिमलाई पनि जिताऔँ– प्रकाशमान सिंह

काठमाडौँ । नेपाली कांग्रेसका नेता प्रकाशमान सिंहले स्थानीय तहको निर्वाचनमा कसैले पनि आफूले मात्र जित्ने सपना नदेख्न चेतावनी दिनुभएको छ । मंगलबार बिहान चन्द्रागिरि नगरपालिकामा आयोजित चुनावी सभामा उहाँले आफूले मात्र चुनाव जित्ने सपना नपाली टिमलाई नै जिताउनका लागि मत मात्र आग्रह गर्नुभयो ।

बहुदलअन्तर्गतको निर्वाचन भएकाले मेयर, उपमेयर, वडाध्यक्ष र वडासदस्यहरुले आफूलाई मात्र भोट नमागी टिमलाई नै जिताउने गरी मत माग्न प्रचार प्रसार गर्नुपर्ने उहाँको भनाइ थियो ।

सबैलाई मिलाएर नेपाली कांग्रेसले संविधानसभाबाट संविधान जारी गरेको स्मरण गराउँदै नेता सिंहले यसले पनि गठबन्धनको औचित्य रहेको प्रमाणित गरेको स्पष्ट गर्नुभयो ।

चन्द्रागिरि नगरपालिकामा सत्ता गठबन्धनबाट नेपाली कांग्रेस, नेकपा (माओवादी केन्द्र) र राष्ट्रिय जनमोर्चाले तालमेल गरेर उम्मेदवारी दिएका छन् । नगर प्रमुखमा कांग्रेसबाट घनश्याम गिरी र उपप्रमुखमा राष्ट्रिय जनमोर्चाबाट रोसनी दानीले उम्मेदवारी दिएका छन् ।