काठमाडौँ । गोरखा नगरपालिकाको मेयरको टिकट वर्तमान मेयर राजनराज पन्तले पाएका छन् । यसअघि मेयरको टिकट विश्वदेव श्रेष्ठलाई दिइएको थियो ।
पार्टी जिल्ला सभापति नन्दप्रसाद न्यौपानेसहित तीन केन्द्रीय सदस्यले जिल्लाको वस्तुगत अवस्थाका बारेमा केन्द्रमा जानकारी गराएपछि उम्मेदवार परिवर्तन भएको हो ।
जिल्लाको रायबिना आफूखुसी उम्मेदवार तोकेको भन्दै उनीहरुले असन्तुष्टि जनाएका थिए । विश्वदेव श्रेष्ठको उम्मेदवारीलाई जिल्लाका नेता तथा कार्यकर्ताले स्वीकार नगरेको तथा पार्टी कार्यालय तालाबन्दी हुँदा अन्य उम्मेवारले मनोनयन गर्नसमेत नपाएको कारण देखाउँदै श्रेष्ठको टिकट खोसिएको स्रोतले बतायो ।
यसअघि मेयरको टिकट पाएका उम्मेदवार विश्वदेव श्रेष्ठमाथि कांग्रेसकै केही कार्यकर्ताले हातपात गरेका थिए । मेयरका लागि टिकट लिएर फर्केका उनी जिल्ला सदरमुकामको बैंकरोडस्थित दीपक डिजिटल फोटो स्टुडियोमा फोटो खिचाउन पसेका बेला स्टुडियोभित्रै पसेर उनीमाथि केही युवाले हातपात गरेका थिए ।
