ललितपुरः सत्तारूढ गठबन्धनबीच महानगरपालिकामा उम्मेदवारहरु तय गर्दा भागबन्डा भए पनि त्यस विपरीत माधव नेपाल नेतृत्वको नेकपा (एकीकृत समाजवादी) ले ललितपुर महानगरपालिकामा प्रमुख र उपप्रमुखमा उम्मेदवारी दिने घोषणा गरेको छ ।
नेकपा (एकीकृत समाजवादी) ललितपुरका अनुसार पार्टीले प्रमुखमा हरिकृष्ण थापा र उपप्रमुखमा उषा बज्राचार्यलाई उम्मेदवार बनाउने निर्णय गरेको छ ।
सत्ता गठबन्धनमा भएको सहमतिमा ललितपुरको प्रमुख (मेयर)मा कांग्रेस र उपप्रमुखमा माओवादी केन्द्रका उम्मेदवारलाई सहयोग गर्ने निर्णय भएको थियो । जुन निर्णयमा एकीकृत समाजवादीका अध्यक्ष माधव कुमार नेपालले पनि हस्ताक्षर गर्नु भएको थियो ।
यी दुबै दलका प्रदेश कमिटीले ललितपुरका बाँकी पालिकामा पनि आइतबार भागबन्डा गरेका थिए। उक्त भागबन्डामा उनीहरूले एकीकृत समाजवादीलाई कुनै पालिकामा पनि प्रमुख र उपमप्रमुख दिएका थिएनन्।
महाँङ्काल गाउँपालिका अध्यक्ष कांग्रेस र उपाध्यक्ष माओवादी केन्द्रले लिएको छ। कांग्रेस र माओवादीले आफूहरूलाई एउटा पनि पालिका नदिएर राजनीतिक दम्भ देखाएको एकीकृत समाजवादीको गुनासो छ ।
गोदावरी नगरपालिकाको प्रमुख र उपप्रमुख नै कांग्रेसले लिएको छ। महालक्ष्मी नगरपालिकाको प्रमुख नेकपा माओवादी केन्द्रलाई र उपप्रमुख कांग्रेसले लिएको छ।
कोन्ज्योसोम गाउँपालिका अध्यक्ष माओवादी केन्द्रलाई र उपाध्यक्ष कांग्रेसले लिएको छ। बागमती गाउँपालिका अध्यक्षमा कांग्रेस र उपाध्यक्ष माओवादी केन्द्रले लिएको छ।
