काठमाडौँ । स्थानीय तह निर्वाचनको आज उम्मेदवारी दर्ता गर्ने दिन । तर सत्तारुढ गठबन्धन भने झन् भन्दा झन् बन्धनमा पर्दै गएको छ । यसबाट नेपाली कांग्रेसलाई सबेभन्दा बढी समस्या उत्पन्न भएको छ । किनभने आजका दिनसम्म पनि कांग्रेसले कहाँ, कसलाई उम्मेदवार बनाउने भन्ने टुंगो अहिलेसम्म पनि लगाउन सकेको छैन ।
महानगर र उपमहानगरपालिकामा सत्तारुढ दलहरुले भागबण्डा गरेका छन् । तर तीन तहहरुमा माओवादी र नेकपा एसले उम्मेदबार नै टुंगो लगाएका भए पनि यता कांग्रेसले भने टुंगो लगाउन सकेको छैन ।
कांग्रेसको कार्यसम्पदन समितिको बैठक सरेको सर्यै छ । त्यसो त त्यो बैठक भन्दा अगावै सक्नुपर्ने काम पनि सकिएको छैन । जस्तै महानगर र उपमहानगरपालिकामा टुंगिएको भए पनि देशैभरिका पालिकाहरुमा के कसरी उम्मेदबार छान्ने भन्ने बारेको मोडालिटी अझै पनि टुंगो लागेको छैन ।
यता कांग्रेसको विधान हेर्ने हो भने कुनै पनि चुनावको कम्तीमा पनि महिना दिन अगावै उम्मेदवारको टुंगो लगाइसक्नुपर्छ । तर कांग्रेसले उम्मेदवार छान्ने संसदीय समिति नै बनाएको छैन ।
प्रदेश र जिल्ला र प्रतिनिधि सभा क्षेत्रमा संसदीय समिति बनेका छन् तर केन्द्रीय संसदीय समिति अझै पनि बन्न सकेको छैन । सो समिति गठन नै नगरी केन्द्रीय कार्यसम्पादन समितिबाटै महानगर र उपमहानगरको टिकट दिने तयारीमा सभापति देउवा रहेको बुझिएको छ । कार्यसम्पादन समितिमा सभापति देउवासहित पदाधिकारी र शीर्ष नेता छन् ।
अहिलेको सत्ता साझेदार दलहरुको गठबन्धनलाई स्थानीय चुनावसम्मै लैजाने निर्णय कांग्रेसले गरेको छ । त्यसको दरिलो पक्षधर पार्टी सभापति देउवा नै हुन् । स्थानीय आवश्यकता र औचित्यका आधारमा चुनावी तालमेल गर्ने चैत १५ को केन्द्रीय समितिको निर्णय भए पनि गठबन्धनबाट छ महानगर र ११ उपमहानगरमा तालमेल सहमति भएको थियो । तर त्यसमा पनि संख्यामा मात्र सहमति भएकाले यता व्यक्ति छान्न कांग्रेसले सकेको छैन ।
गठबन्धनको सहमति अनुसार कांग्रेसले छमध्ये तीन महानगरमा मेयर उठाउँदैछ । काठमाडौं, ललितपुर र विराटनगरमा कांग्रेसले मेयर उठाउन पाउने छ । तर त्यहाँ पनि अहिलेसम्म उम्मेदवार टुंग्याउन सकेको छैन ।
यस्तै उपमेयरमा पोखरा, भरतपुर र वीरगञ्जमा कांग्रेसले उम्मेदवारी दिने सहमति बने पनि कुनै पनि स्थानको उम्मेदवार टुंगिएको छैन । आकांक्षी धेरै र देउवा तथा शेखर कोइराला पक्षबीचको गुट विवादले गर्दा उम्मेदवारी टुंगो लाग्न सकस परेको छ ।
उता ११ उपमहानगरमध्ये कांग्रेसले सात स्थानमा मेयर उठाउँदैछ । धरान, इटहरी, कलैया, बुटवल, तुलसीपुर, नेपालगञ्ज र धनगढीमा मेयर उठाउने कांग्रेसको तयारी छ । तर उपमहानगरहरुमा पनि कांग्रेसले उम्मेदवारको टुंगो लगाउन सकेको छैन ।
