एजेन्सी । इंग्लिस प्रिमियर लिग फुटबल अन्तर्गत म्यान्चेस्टर सिटीले सानदार जित निकालेको छ । उपाधि होडमा रहेको सिटीले वाटफोर्डलाई घरेलु मैदानमा ५–१ गोलले हराएको हो ।
सिटीलाई जित दिलाउन गाब्रियल जिससले ह्याट्रिकसहित चार गोल गरे भने रोड्रीले एक गोल गरे । जिससले ४, २३, ४९ (पेनाल्टीमार्फत) र ५३ औं मिनेटमा गोल गरेका हुन् भने रोड्रीले ३४ औं मिनेटमा गोल गरे । यता २८ औं मिनेटमा हसाने कामराले वाटफोर्डका लागि एक गोल फर्काए ।
जितसँगै लिगको शीर्ष स्थानमा रहेको सिटीको ३३ खेलबाट ८० अंक छ । समान खेलबाट ३२ अंकसहित वाटफोर्ड १९ औं स्थानमा रहेको छ ।
