काठमाडौं । इंग्लिस प्रिमियर लिग फुटबल अन्तर्गत आर्सनलले जित निकालेको छ । शनिबार भएको खेलमा आर्सनलले म्यान्चेस्टर युनाइटेडलाई ३–१ गोलले पराजित गरेको हो ।
घरेलु मैदान इमिरेट्समा खेलको तेस्रो मिनेटमा नै नुनो टाभारेसको गोलबाट आर्सनलले सुरुवाती अग्रता बनाएको थियो ।
३२ औं मिनेटमा बुकायो साकाले पेनाल्टीमार्फत गोल गर्दै आर्सनलको अग्रता दोब्बर पारे । तर, त्यसको दुई मिनेटपछि अर्थात् ३४ औं मिनेटमा क्रिस्टियानो रोनाल्डोले गोल गर्दै युनाइटेडलाई २–१ को अवस्थामा खेलमा फर्काए ।
५६ औं मिनेटमा ब्रुनो फर्नान्डेजले युनाइटेडलाई बराबरी गर्ने सुनौलो अवसर खेर फाले । उनले पेनाल्टी मिस गरे । उनको प्रहार देब्रे पोस्टमा ठोक्किएर बाहिरियो ।
यस्तै, ६० औं मिनेटमा युनाइटेडका क्रिस्टियानो रोनाल्डोले गरेको गोलले मान्यता पाएन । उनी अफसाइड रहे ।
खेलको ७० औं मिनेटमा ग्रानिट जाकाले डि–बक्स बाहिरबाट लेफ्ट फुटले उत्कृष्ट गोल गर्दै आर्सनललाई ३–१ को अवस्थामा ल्याए ।
यो नतिजापछि आर्सनल चौंथो स्थानमा उक्लिएको छ । उसको ३३ खेलबाट ६० अंक छ । पराजित युनाइटेड ३४ खेलबाट ५४ अंकसहित तालिकाको छैटौं स्थानमा रहेको छ ।
