काठमाडौं । सत्तारूढ गठबन्धनले भागबन्डाको निर्णय टुंगाउँदै भरतपुर महानगरको मेयर माओवादी केन्द्रलाई दिएपछि भरतपुरका कांग्रेस नेता/कार्यकर्तामा देखिएको असन्तुष्टि अझै थामिन सकेको छैन ।
शुक्रबार बिहान जिल्ला सभापति राजेश्वर खनालले सबैलाई केन्द्रको निर्णय मान्न आग्रह गरेपनि दिउँसो असन्तुष्टहरूले पार्टी कार्यालयमा भेला गरेका छन् ।
कांग्रेस केन्द्रीय सदस्य रहेका टेकप्रसाद गुरूङ र दिनेश कोइराला, पूर्वसांसद जगन्नाथ पौडेल, भीमबहादुर श्रेष्ठ, पूर्वजिल्ला सभापति कृष्णलाल सापकोटा र जितनारायण श्रेष्ठलगायत सहभागी भेलाले मेयरमा स्वतन्त्र उम्मेदवारी दिने तयारी थालेको स्रोतले जनाएको छ ।
भोलिसम्ममा उम्मेदवार बनाउने भन्ने टुंगो लगाउने भेलाको निष्कर्ष छ । यस्तै, भेलापछि उनीहरूले पार्टी जिल्ला सभापति राजेश्वर खनालको कार्यकक्षमा ताला समेत लगाइदिएका छन् ।
