काठमाडौँ । मेलम्ची खानेपानी आयोजनाको मुहानबाट सुरुङमा हालिएको पानी सुन्दरीजल हुँदै काठमाडौँमा आइपुगेको छ ।
अहिले काठमाडौँका केही स्थानमा आइपुगेको पानी परीक्षणका रुपमा रहेकाले कसैले प्रयोग गरेको छैन । मेलम्चीको पानी घरघरका धारामा आउँदा पनि प्रयोग नगरिएकाले पानी खेर गई बागमती र धोबीखोलामा बगेको छ ।
गत वर्ष असार १ गतेदेखि नै पानी बन्द गरिएको सुरुङको फोहर पखालेर पानी अहिले वाग्मतीमा छोडिएको छ । मेलम्चीको पानी छोडेपछि बागमती र धोबी खोलाको बहाव केही बढेको देखिन्छ ।
गत चैत २९ गते मङ्गलबार सिन्धुपाल्चोकको हेलम्बु गाउँपालिकास्थित मेलम्ची खानेपानी आयोजनाको मुहानबाट पानीलाई सुरुङमा हालिएको थियो । पानी सुन्दरीजलमा सोमबार राति पौने १० बजे आइपुगेको थियो ।
सुरुङको पिँधमा आइपुगेको पानीले उचाइ लिन तीनदेखि चार दिन लाग्ने मेलम्ची आयोजनाको परामर्शदाता कम्पनी इप्तिसाका इञ्जीनियर विवेक खनालले जानकारी दिनुभयो । पानी आएपछि राति वासिङ गर्ने च्यानलमा पानी देखिएको थियो । च्यानलमा पानी देखिएपछि मेलम्चीको पानी सुन्दरीजल आइपुगेको पुष्टि भएको हो ।
