नेपाली काँग्रेससँग असन्तुष्ट रहँदै आउनु भएका काँग्रेसका पूर्व नेता गोविन्दराज जोशीले नेकपा एमालेसँग चुनावी तालमेलका लागि सहमति गर्नु भएको छ ।
खासगरी आफ्ना छोरा दीपकराज जोशीलाई राजनीतिमा अघि बढाउन गोविन्दराज जोशीले जुनसुकै किसिमको गठबन्धनमा जान चाहनु भएको स्थानीयको भनाई छ । आफूलाई काँग्रेसले खासगरी रामचन्द्र पौडेलले जिल्लामा पेलेको र राजनीतिक जीवन नै समाप्त पार्न खोजेको गोविन्दराज जोशीको आरोप छ ।
यही मेसोमा जोशी निवास दमौलीमा शनिबार जोशी र एमालेका स्थानीय नेताहरुबीच चुनावी तालमेल गर्ने विषयमा छलफल भई निर्णय भएको थियो । नेकपा एमाले तनहुँ र जोशी समूहका चार चार जना राखेर आठ सदस्यीय चुनाव परिचालन समिति गठन गरिएको छ ।
गोविन्दराज जोशीका छोरा दीपकराजले तनहुँका पालिकाहरुमा एमालेसँग तालमेल गर्ने सहमति भएको बताएका छन् । एमालेसँग प्रत्येक पालिकाका प्रमुख उपप्रमुख, अध्यक्ष उपाध्यक्ष, वडाध्यक्ष र सदस्यहरुको साझा उम्मेदवार बनाउने सहमति भएको पनि दीपकराजले बताएका छन् ।
दीपकराज जोशीले तनहुँको व्यास नगरपालिकाको प्रमुखमा उम्मेदवारी दिने घोषणा गरेर चुनावी प्रचारमा लागिसकेका छन् । तर व्यास नगरपालिकाको प्रमुखको विषयमा भने निर्णय भइ सकेको छैन ।
गत प्रतिनिधिसभा निर्वाचनमा कांग्रेस नेता रामचन्द्र पौडेलविरुद्ध बागी उम्मेदवारी दिएपछि कांग्रेसले गोविन्दराज जोशीलाई पाँच वर्षका लागि पार्टीबाट निस्कासन गरेको थियो ।
तत्कालीन नेकपाका उम्मेदवार कृष्णकुमार श्रेष्ठ (किसान)लाई जिताउन भूमिका खेलेको आरोप गोविन्दराज जोशीमाथि लागेको छ ।
