नयाँ दिल्ली । भारतको पूर्वी राज्य झारखण्डमा कम्तीमा ४८ व्यक्ति २० घण्टाभन्दा बढी समयदेखि रोपवे ट्रलीभित्र फसेका छन् । एक स्थानीय अधिकारीका अनुसार एक जनाको मृत्यु भएको छ ।
राज्यको देवघर जिल्लामा आइतबार दिउँसो रोपवेको चेन एक्कासी निस्किएपछि उक्त दुर्घटना भएको हो । दुर्घटना हुँदा रोपवे पहाडबाट गुज्रिरहेको थियो ।
हालसम्म १० जनाभन्दा बढीको उद्धार गरिएको छ । उद्धारका क्रममा एक महिलाको मृत्यु भएको छ भने एक बालकको अवस्था गम्भीर रहेकाले स्थानीय अस्पतालमा पठाइएको छ ।
राष्ट्रिय प्रकोप प्रतिक्रिया बल (एनडीआरएफ), भारतीय वायुसेना (आईएएफ), स्थानीय विपद् व्यवस्थापन एकाइहरू र जिल्ला प्रशासनका अधिकारीहरूले ट्रली भित्र फसेकाहरूलाई तल ल्याउने प्रयास गरिरहेका छन् ।
दुर्घटनामा परेकाहरुलाई १२ वटा छुट्टाछुट्टै ट्रलीमा राखिएको थियो । “दुई एमआई–१७ हेलिकप्टर उद्धार कार्यमा संलग्न छन्। अपरेशन अझै जारी छ”, भारतीय वायुसेना (आईएएफ) ले भन्यो ।
फसेकाहरूलाई खाना र पानी आपूर्ति गर्ने प्रयास भइरहेको एक आईएएफ अधिकारीले बताए । सिन्ह्वा
