एजेन्सी । १५ औं संस्करणको इन्डियन प्रिमियर लिग (आईपीएल) अन्तर्गत गएराति भएको रोमाञ्चक खेलमा लखनउ सुपर जाइन्ट्सले दिल्ली क्यापिटल्सलाई ६ विकेटले पराजित गरेको छ । जितसँगै लखनउ अंक तालिकाको दोस्रो स्थानमा उक्लिएको छ ।
मुम्बईको डीवाई पाटिल स्टेडियममा भएको खेलमा लखनउले दिल्लीले दिएको १५० रनको लक्ष्य चार विकेट गुमाएर पुरा गरेको हो । लखनउका लागि क्विन्टन डी ककले ८० रन बनाए ।
लखनउका कप्तान केएल राहुलले टस जितेर पहिले बलिङ रोजेका थिए । दिल्लीले राम्रो सुरुवात गरेको थियो । पृथ्वी शले पहिलो विकेटको लागि ४५ बलमा ६७ रनको साझेदारी गरे। यस अवधिमा शाले ३० बलमा आफ्नो अर्धशतक पूरा गरे ।
त्यसपछि पृथ्वी ३४ बलमा ६१ रन बनाएर आउट भएपछि दिल्लीले ७ रनमै तीन विकेट गुमाएको थियो । तर, ऋषभ पन्त र सरफराज खानले चौथो विकेटका लागि ७५ रनको साझेदारी गर्दै टोलीको स्कोर १४९ रनमा पुर्याएका थिए । दिल्लीका लागि सिजनको पहिलो खेल खेल्न आएका डेभिड वार्नर असफल रहे । उनले चार रन मात्रै बनाउन सके ।
दिल्लीका लागि पृथ्वीले सर्वाधिक ६१ रन बनाए भने ऋषभ पन्त ३९ रनमा र सर्फराज खान ३६ रनमा अविजित रहे । लखनउका रवि बिश्नोई सबैभन्दा सफल बलर बने । उनले २२ रन खर्चेर दुई विकेट लिए ।
दिल्लीले दिएको १५० रनको लक्ष्य पछ्याएको लखनउले राम्रो सुरुवात गर्दै पहिलो विकेटको लागि ७३ रन जोड्यो । केएल राहुल र क्विन्टन डी ककले टोलीलाई सानदार सुरुवात दिलाए । तर, राहुल २५ बलमा २४ रन बनाएर आउट भए । उनलाई कुलदीप यादवले आउट पारे । त्यसको केही समयपछि नै इभिन लुइस पनि सस्तैमा पेभिलियन फर्किए । दीपक हुडाले पनि खासै केही गर्न सकेनन् र १३ बलमा ११ रन बनाएर आउट भए । तर, क्विन्टन डी ककले रन बनाउने क्रम जारी राखे र आउट हुनुअघि ५२ बलमा ८० रन बनाए ।
अन्तिम ओभरमा क्रुणाल पाण्ड्या र आयुष बडोनीले महत्वपूर्ण साझेदारी गरे । दुई बल बाँकी रहँदा लखनउले खेल जित्यो । क्रुणाल १४ बलमा १९ रनमा अविजित रहे भने आयुषले तीन बलमा १० रन बनाए ।
