काठमाडौँ । प्रधानमन्त्री शेरबहादुर देउवाले गोविन्द बन्दीलाई कानून, न्याय तथा संसदीय मामिला मन्त्रीमा नियुक्त गर्नुभएको छ ।
हाल सो मन्त्रालय सम्हाल्दै आउनुभएका दिलेन्द्रप्रसाद बडूलाई उद्योग वाणिज्य मन्त्रालय दिने तयारी गरिएको बताइएको छ ।
प्रधानमन्त्री देउवाले रक्षा मन्त्रालय भने आफूसँगै राखेर मन्त्रिपरिषद् विस्तार गर्न लाग्नुभएको छ । नेकपा एसका अध्यक्ष नेपालले बन्दीलाई गत भदौमा नै कानूनमन्त्री बनाउने तयारी गर्नुभएको थियो ।
सङ्क्रमणकालीन न्यायको ज्ञाताका रुपमा चिनिनुभएका बन्दी गैरसांसद हुनुहुन्छ । नेकपा (एकीकृत समाजवादी) निकट बन्दीले वर्तमान सरकार गठनका लागि न्यायिक लडाइँमा साथ दिनुभएको थियो ।
बन्दीको सपथका लागि आवश्यक तयारी गर्न प्रधानमन्त्री कार्यालयले राष्ट्रपतिको कार्यालयलाई जानकारी गराइसकेको बताइएको छ ।
