काठमाडौं । नेकपा एमालेको साइबर सर्कलले आफ्नो पार्टीबारे उत्कृष्ट टिकटक बनाउनेलाई १ लाख रुपैयाँ दिने भएको छ ।
एमाले निकट युवा सङ्घ र साइबर सर्कलले टिकटक प्रतियोगिता गर्न लागेको हो ।
स्थानीय निर्वाचन नजिकिरहेका बेला नेकपा एमालेको कार्य तथा विचार झल्किने टिकटक भिडिओ प्रतियोगिता आयोजना गर्न लागिएको सर्कलले जनाएको छ ।
सर्कलका प्रमुख मदन भण्डारीका अनुसार प्रथम पुरस्कार एक लाख, द्वितीय पुरस्कार पचास हजार र तृतीय पुरस्कार २५ हजार घोषणा गरिएको छ ।
भिडियोका लागि केही सर्तहरू पनि तोकिएका छन् । भिडियो चैत २१ देखि २०७९ वैशाख ३० गतेसम्म अपलोड गरिसक्नुपर्ने छ । यस्तै, भिडियो व्यक्तिगत रूपमा सिर्जना गर्नुपर्ने, एमालेले अघि सारेका योजना र विकासमा आधारित हुनुपर्ने, भिडियो दुई मिनेटको हुनुपर्नेलगायत सर्त राखिएको छ ।
पार्टीको प्रचार–प्रसार र चुनावलक्षित कार्यक्रमअनुसार यो प्रतियोगिता आयोजना गरिएको साइबर सर्कलका कार्यालय सचिव परशु सुवेदीले जानकारी दिए ।
