काठमाडौं । त्रिकोणात्मक टी–ट्वान्टी अन्तर्राष्ट्रिय क्रिकेट श्रृङ्खलाको उपाधि नेपालले जितेको छ ।
कीर्तिपुरस्थित टियु मैदानमा भएको फाइनल खेलमा नेपालले पपुवा न्युगिनीलाई ५० रनले हराउँदै उपाधि हात पारेको हो ।
१६९ रनको विजयी लक्ष्य पछ्याएको पीएनजीले १६.१ ओभरमा अलआउट हुँदै ११८ रनमात्र जोड्यो ।
पीएनजीका लागि सेसे बाउले सर्वाधिक ३८ बलमा ५९ रन जोडे । उनले ६ छक्का र १ चौका प्रहार गरे । यस्तै, लेगा सिएकाले १४ बलमा ८, आशाद भालाले ९ बलमा ८, आल्र्स आमिनीले १४ बलमा १५ रन जोडे ।
नेपालका लागि दिपेन्द्र सिंह ऐरीले चार, करण केसीले तीन विकेट लिए भने सन्दीप लामिछानेले दुई विकेट लिए ।
त्यसअघि टस हारेर ब्याटिङमा उत्रिएको नेपालले पीएनजीलाई १६९ रनको विजयी लक्ष्य दिएको थियो । नेपालले २० ओभरमा ६ विकेटको क्षतिमा १६८ रन जोड्यो ।
नेपालका लागि दिपेन्द्र सिंह ऐरीले अर्धशतकीय इनिङ्स खेले । उनले ३८ बलमा ५४ रन जोडे । उनले ५ चौका प्रहार गरे । यस्तै, करण केसीले मात्र १२ बलमा ३३ रनको योगदानी दिए । उनले ५ चौका र १ छक्का प्रहार गरे ।
यस्तै, ओपनर कुशल भुर्तेलले २२ बलमा २५, आरिफ शेखले २९ बलमा २९ रन जोडे । रोहित पौडेल २ रनमा आउट हुँदा आरिफ शेख र दिलीप नाथले खाता खोल्न सकेनन् । आदिल आलमले १३ बलमा १५ रन जोड्दै पेभिलियन फर्किए ।
पीएनजीका लागि सेमो कमिआले तीन विकेट लिँदा चाड सोपर, कावुआ मोरीआ र रिले हेकुरेले एक–एक विकेट लिए ।
नेपाल अपराजित रहँदै च्याम्पियन बनेको हो । लिगमा नेपालले पीएनजीलाई १५ रन र ३७ रनले हराएको थियो भने मलेसियालाई ६ विकेट र ८५ रनले पराजित गरेको थियो । दुई ओडिआई खेलको सिरिजमा भने नेपालविरुद्ध पपुवा न्युगिनीले क्लिनस्विप गरेको थियो ।
नेपाल, पपुवा न्युगिनी र मलेसिया सहभागी त्रिकोणात्मक टी–ट्वान्टी श्रृङ्खलाको ‘प्लेयर अफ दी सिरिज’ नेपालका ऐरी घोषित भए । उनले प्रतियोगिता अवधिभर पाँच खेलमा २५५ रन बनाउनुका साथै सात विकेटसमेत लिए । ऐरी आजको फाइनल खेलको ‘प्लेयर अफ दी म्याच’ समेत भए ।
