विराटनगर । विद्युत् प्रसारण लाइन कमजोर भएका कारण सुनसरी–मोरङ औद्योगिक करिडोरका उद्योगमा ‘ट्रिपिङ’ नोक्सानी बढेको भन्दै उद्योगी–व्यवसायीले चिन्ता व्यक्त गरेका छन् । ‘सर्किट चेन’ले भार थाम्न नसक्दा बारम्बार दोहोरिने ट्रिपिङले उत्पादनमा समस्या हुने गरेको उद्योगीहरूले गुनासो गरेका हुन् ।
मोरङ व्यापार सङ्घका अध्यक्ष प्रकाश मुन्दडाले प्रशस्त विद्युत् भएर पनि उपभोग गर्न नसकेको बताउनुभयो । उहाँले ठूला–ठूला उद्योग स्थापना हुने क्रम बढ्दै जाँदा कोरिडोर क्षेत्रमा प्रसारण लाइनले भारवहन गर्न नसक्ने स्थिति आइसकेको बताउनुभयो । जसका कारण दैनिक सात करोड बराबरको क्षति बेहोर्नु परेको अध्यक्ष मुन्दडाको भनाइ छ ।
कच्चा पदार्थ प्रशोधनमा रहेका बखत विद्युत् कटौती भए वा ‘हल्ट’ हुन गए चालू घानी नै डिफल्ट हुने तर्क मुन्दडाको छ । पाँच सय उद्योग रहेको करिडोरमा एकै पटक सबै मिल मेसिनरी खराबी हुने गरी विद्युत् ट्रिपिङ हुने गरेको उद्योगीहरूको गुनासो छ । मासिक दुई अर्ब बढीको क्षति विद्युत्का कारणले बेहोर्नु परेको भन्दै उद्योगीहरूले तत्काल प्रसारण लाइन स्तरोन्नति गरिनुपर्ने माग गरेका छन् ।
औद्योगिक करिडोरमा दैनिक चार पटकसम्म ट्रिपिङ हुने गरेको गुनासो छ । ‘प्रडक्सन प्रोसेसिङ’मा रहेको कच्चा पदार्थ ध्वस्त हुन्छ, अर्का उद्योगी पवन सारडाले भन्नुभयो, “विद्युत् त उत्पादन भयो तर प्रसारण लाइन स्तरोन्नति भएन, त्यसले उद्योगीलाई नै नोक्सान पुग्नेभयो । ”उद्योगीको चासो सम्बोधन गर्नकै लागि नेपाल विद्युत् प्राधिकरणले प्रसारण लाइनलाई ओ–थ्रिबाट डग कन्डक्टरमा स्तरोन्नति गरिरहेको भए पनि आवश्यक ट्रान्सफर्मर राख्ने ठाउँ नै नपाउने गरेको दाबी गर्दै आएको छ तर उद्योग सङ्गठन मोरङका अध्यक्षले राज्यको निकायले स्तरोन्नति गर्न नसकेको र ट्रान्सफर्मर राख्न नसकेको भन्न नपाउने बताउनुहुन्छ । वस्तु उत्पादन गरेपछि बिक्री गर्ने माध्यम बनाउन नसक्नु प्राधिकरणको कमजोरी रहेको सङ्गठनका अध्यक्ष प्याकुरेलको बुझाइ छ ।
अध्यक्ष प्याकुरेलले दैनिक तीन–चार पटकको ट्रिपिङमा २० प्रतिशतसम्म कच्चा पदार्थ नोक्सान हुने दाबी गर्नुभयो । प्लास्टिकका मझौला उद्योगले दैनिक ७५ देखि एक लाखसम्मको कच्चा पदार्थ गुमाइरहेको उहाँको गुनासो छ । विद्युत् ट्रिपिङमा प्लास्टिक, सिमेन्ट र फलाम उद्योगलाई धेरै नोक्सानी पर्ने गरेको बताइन्छ । उद्योगी एवं बन्धन सिमेन्टका सञ्चालक मनीष मारुले दैनिक दुई करोड बराबरको क्षति प्रदेश १ का १३ सिमेन्ट उद्योगले बेहोर्दै आएको दाबी गर्नुभयो ।
नेपाल विद्युत् प्राधिकरणको दुहवी ग्रिडका प्रमुख राजेश रेग्मीले प्रसारण लाइनका कारण भार थेग्न नसक्ने अवस्था रहेकोले समस्या परिरहेको बताउनुभयो । अहिले दुहवी ग्रिडबाट प्रदेश १ मा २३३ मेगावाट विद्युत् आपूर्ति भइरहेको छ । यो मागअनुसार तलमाथि हुने गरेको छ । दुहवी ग्रिडबाट १५९ मेगावाट अनारमनीबाट ५२ मेगावाट र दमकबाट ३२ मेगावाट विद्युत् वितरण भइरहेको छ ।
काबेली करिडोरअन्तर्गत १६५ मेगावाट विद्युत् पनि ग्रिडमा थपिएको छ । माथिल्लो तामाकोसीबाट आउने ६५ मेगावाट विद्युत् पनि ग्रिडमा जोडिएको छ । दुहवी ग्रिडले नेपालमै विद्युत् मागभन्दा बढी भएकाले भारतको कटैयाबाट अहिले विद्युत् लिनु परेको छैन । समाचार गोरखापत्र दैनिकमा प्रकाशित छ ।
