पर्सा । प्रहरीले नेपालबाट भारततर्फ बिक्री वितरणको लागि लैजाँदै गरेको २ वटा हात्तीसहित ३ जनालाई पक्राउ गरेको छ ।
पकहामैनपुर गाउँपालिका– ५ पोखरिया टोलबाट उनीहरुलाई शनिबार दिउँसो प्रहरीले नियन्त्रणमा लिएको हो ।
पक्राउ पर्नेहरूमा चितवन भरतपुर महानगरपालिका– १८ जितपुर बस्ने ६० वर्षीय बुदिराम महतो, सोही ठाउँ बस्ने ४० वर्षीय राजु कुमाल र पर्सा पकहामैनपुर गाउँपालिका– ५ सबैठवा बस्ने ३५ वर्षीय सफरोज आलम रहेका छन् ।
उक्त स्थानमा बिक्री वितरणको लागि हात्तीहरू लैजाँदै गरेको सूचना प्राप्त हुनासाथ ईलाका प्रहरी कार्यालय पोखरिया पर्साबाट खटिएको प्रहरीले उनीहरूलाई पक्राउ गरेको हो ।
उनीहरूलाई आवश्यक कारवाहीको लागि पर्सा राष्ट्रिय निकुञ्जमा बुझाउने कार्य भएको प्रहरीले जनाएको छ ।
