काठमाडौं I प्रधानन्यायाधीश चोलेन्द्रशम्शेर जबराको राजीनामा माग्दै आज पनि कानून व्यवसायीहरुले प्रदर्शन गरेका छन् । सर्वाेच्च अदालतको मूल प्रवेशद्वार अगाडि प्रदर्शन गरेर बाटो अबरोध गरेपछि प्रधानन्यायाधीश राणा महान्यायाधीवक्ताको कार्यलयसँगै रहेको सर्वाेच्च अदालतको अर्को गेटबाट कार्यालय प्रवेश गर्नु भएको छ ।
शुक्रबार पनि मूल प्रवेशद्वारमा कानून व्यवसायीहरुले प्रदर्शन गरेपछि राणा सोही गेटबाट अदालत प्रवेश गर्नु भएको थियो । यसैबीच सुरक्षाकर्मीले प्रदर्शनमा उत्रिएका कानून व्यवसायीलाई संयमित हुन अनुरोध गरेको छ ।
प्रदर्शनमा सहभागी केही कानून व्यवसायीहरु उत्तेजित हुँदै बसिरहेको स्थानबाट प्रधानन्यायाधीशलाई अवरोध गर्न जान खोजेपछि प्रहरीले संयमित हुन चेतावनी दिएको हो । संयमित प्रदर्शन नगरे बल प्रयोग गर्ने चेतावनी पछि प्रदर्शन केही संयमित बनेको थियो ।
शुक्रबार रामशाहपथ स्थित मुलबाटोमा नै प्रदर्शन गरेका कानून व्यवसायीहरुले आज पनि सर्वाेच्चकाे परिसरमा प्रदर्शन गरेका छन् ।