काठमाडौं । मोबाइल गेम पब्जीको पीएमपीएल मेना एण्ड साउथ एसिया च्याम्पियनसिप अन्तर्गत पहिलो सिजनमा नेपाली पब्जी टिम डीआरएस गेमिङले दोस्रो स्थान हासिल गरेको छ ।
आइतबार सम्पन्न प्रतियोगितामा कुल १२७ पोइन्ट र ५५ किलसहित दोस्रो भएको डीआरएसले २८ हजार डलर अर्थात करिब ३३ लाख रुपैयाँ जित्न सफल भएको हो । त्यसैगरी नेपालबाटै सहभागी अन्य दुई टोलीले छैठौं र सातौं स्थान प्राप्त गरे ।
कुल ८७ पोइन्ट र ४६ किलसहित डेडआइज गाइज (डीई) छैठौं भएको छ भने विजेज विथ भाइब्स (डब्लुजेडभी) ७९ पोइन्ट र ३८ किल सहित सातौं भएको छ ।
दुवै टोलीले क्रमशः पाँच हजार डलर र चार हजार सात सय ५० डलर जिते ।
त्यस्तै डीआरएस भन्दा मात्र तीन पोइन्टले अघि रहेर साउदी अरेबियाको टोली ‘रिको इन्फिनिटी’ ले प्रथम स्थान हासिल गरेको छ । प्रतियोगितामा १३० पोइन्ट र ५० किल सहित पहिलो भएर सो टोलीले ४० हजार डलर पुरस्कार जित्यो ।
योसँगै आउँदो पीएमजीसी २०२१ को लागि रिको इन्फिनिटी, स्टलवार्ट इस्पोर्टस, क्रिप्टिक्स र डेडआइज गाइज छनौट भएको छ । पोइन्टसको आधारमा यसअघि नै डीआरएस गेमिङ र निग्मा ग्यालेक्सीले छनौटमा स्थान बनाइसकेका छन् ।
कार्यक्रममा मध्य पुर्वी, दक्षिण एसिया, उत्तर अफ्रिका क्षेत्रका देशहरू र ताईवान गरी कुल २० टोलीले सहभागिता जनाएका थिए ।