काठमाडौं । आसन्न शहीद स्मारक ‘ए’ डिभिजन लिगका लागि अखिल नेपाल फुटबल संघ (एन्फा)ले र कतार एयरवेजले सम्झौता नवीकरण गरेका छन् ।
बुधबार दिउँसो एन्फा कम्प्लेक्समा पत्रकार सम्मलेनको आयोजना गर्दै एन्फा अध्यक्ष कर्माछिरिङ शेर्पा र कतार एयरवेजका कन्ट्री म्यानेजर मोहमद एल इमामले सम्झौता पत्रमा हस्ताक्षर गरेका हुन् ।
कतार एयरवेजले थप एक वर्षका लागि लिगको प्रायोजनको सम्झौता गरेको छ ।
शहीद स्मारक ए डिभिजन लिग शुक्रबार (३ गते)देखि सुरु हुँदैछ ।
पत्रकार सम्मलेनमा बोल्दै एन्फा अध्यक्ष शेर्पाले सम्झौता नवीकरणसँगै आगामी समयमा रकम वृद्धि गर्ने आश्वासन समेत भएको बताए ।
एयरवेजका कन्ट्री म्यानेजर एल इमामले एन्फासँगको सम्झौता फ्रेन्च क्लब पेरिस सेन्ट जर्मन र जर्मन क्लब बायर्न म्युनिखसँग जस्तै सम्झौता रहेको बताए ।
कतार एयरवेजले लिग सञ्चालनको प्रायोजन स्वरुप एन्फालाई करिब १ करोढ ७० लाखभन्दा बढी रकम दिने अध्यक्ष शेर्पाले जानकारी दिए ।
त्रिपुरेश्वरस्थित दशरथ रंगशालामा हुने उद्घाटन खेलमा सातदोबाटो युथ क्लब र फ्रेन्ड्स क्लबले प्रतिस्पर्धा गर्नेछन् । उक्त खेल अपरान्ह ४ः४५ बजे सुरु हुनेछ ।
कुल ९१ खेल हुने लिगमा ए डिभिजनका १४ क्लबले प्रतिस्पर्धा गर्नेछन् ।
लिगको पुछारका दुई टिम रेलिगेसनमा पर्दै ‘बी’ डिभिजनमा घटुवा हुनेछन् । लिग विजेताले ७५ लाख पाउने छन् भने उपविजेताले ५० लाख प्राप्त गर्दा तेस्रो हुनेले २५ लाख पाउनेछन् ।