काठमाडौं । दक्षिण अफ्रिकी क्रिकेटर एबी डी भिलियर्सले क्रिकेटका सबै फर्म्याटबाट सन्यासको घोषणा गरेका छन् ।
‘मिस्टर ३६०’ले परिचित डी भिलियर्सले १७ वर्षे करियरको अन्त्य गर्दै शुक्रबार सन्यासको घोषणा गरेका हुन् ।
दक्षिण अफ्रिकी ३७ वर्षीय डी भिलियर्सले टेस्ट क्रिकेटमा एक सय १४ खेल खेल्दै २२ शतक र ४६ अर्धशतकसहित ८ हजार ७ सय ६५ रन बनाएका छन् ।
यस्तै एकदिवसीय अन्तर्राष्ट्रिय क्रिकेटमा २ सय २८ खेल खेल्दा २५ शतक र ५३ अर्धशतकसहित ९ हजार ५ सय ७७ रन बनाएका छन् भने टी–ट्वान्टी अन्तर्राष्ट्रिय क्रिकेटमा ७८ खेल खेल्दै १० पटक अर्धशतक बनाएका छन् ।
‘यो मेरालागि अविश्वसनीय यात्रा रह्यो, तर, मैले क्रिकेटबाट सन्यास लिने निर्णय गरेको छु,’ उनले सामाजिक सञ्जालमा लेखेका छन् ।
सन् २०१८ यता राष्ट्रिय टोलीमा नरहेका डे भिलियर्सले यसबीचमा व्यावसायिक क्रिकेट भने खेलिरहेका थिए । उनले रोयल च्यालेन्जर्स बैंगलोरबाट इन्डियन प्रिमियर लिग–आईपीएल खेल्दै आएका थिए ।
एकदिवसीय अन्तर्राष्ट्रिय क्रिकेटमा उनले सबैभन्दा थोरै बलमा अर्धशतक, शतक र एक सय ५० रन बनाउने खेलाडीको विश्व कीर्तिमान राखेका छन् ।
उनी तीनपटक आईसिसी ओडीआई प्लेयर अफ दी इयर घोषित भएका थिए । उनलाई आईसिसीले पछिल्लो दशककै सर्वोत्कृष्ट एकदिवसीय अन्तर्राष्ट्रिय खेलाडीको अवार्ड पनि दिएको थियो।