न्यूजील्याण्डविरुद्धको तीन खेलको टी-ट्वान्टी अन्तर्राष्ट्रिय शृंखला भारतले जितेको छ ।
लगातार दुई खेलमा न्यूजील्याण्डलाई हराएको भारतले शृंखला नै कब्जा गरेको हो । भारतको राँचीमा शुक्रबार राति भएको दोस्रो टी-ट्वान्टीमा न्यूजील्याण्डलाई ७ विकेटले सहजै हराउँदै भारतले एक खेल अगाबै शृंखलामा कब्जा जमाएको हो ।
न्यूजील्याण्डले दिएको १५४ रनको झिनो लक्ष्य भारतले १७.२ बलमा ३ विकेट गुमाएर पूरा गर्यो । भारतको जितमा केएल राहुल र कप्तान रोहित शर्मा नायक रहे । राहुलले ६५ तथा शर्माले ५५ रनको योगदान गरे ।
यस्तै वेन्कटेस आयरले अविजित १२ रन बनाए भने रिषभ पन्तले अविजित १२ रन बनाए । सूर्यकुमार यादव १ रनमा आउट भए । न्यूजील्याण्डका तिब्र गतिका बलर टिम साउदीले ३ विकेट लिए ।
यसअघि पहिले ब्याटिङ गरेको न्यूजील्याण्डले २० ओभरमा ६ विकेट गुमाएर १५३ रन मात्र बनाएको थियो ।
न्यूजील्याण्डको शुरुआती ब्याटिङ निकै राम्रो भए पनि मध्यक्रममा खस्केको थियो । ग्लेन फिलिप्सले ३४ रन बनाए । मार्टिन गप्टिल र ड्यारिल मिचेलले समान ३१-३१ रन जोडे । मार्क च्याम्पम्यानले २१ तथा टिम सेइफर्टले १३ रन बनाए ।
भारतका हर्सल पटेलले दुई विकेट लिए । भुवनेश्वर कुमार, रविचन्द्र अश्विन, दिपक चहर र अक्षर पटेलले १-१ विकेट लिए ।
जितसँगै तीन खेलको शृंखलामा भारतले २-० को अग्रता बनाएको छ । तेस्रो तथा अन्तिम खेल आइतबार हुनेछ । एजेन्सी