काठमाडौं । नेपाली कांग्रेसका केन्द्रीय सदस्य गगन थापाले आसन्न महाधिवेशनबाट कांग्रेसलाई आम जनताले भरोषा र विश्वास गर्ने पार्टी बनाउनुपर्ने बताएका छन् ।
कांग्रेसको चौधौं महाधिवेशनका लागि महामन्त्रीमा उम्मेदवारी घोषणा गरेका थापाले सोमबार एक अपिल जारी गर्दै सो कुरा बताएका हुन् ।
यस्तै थापाले क्षेत्रीय प्रतिनिधि पार्टीको आधारभूत तहको निर्णायक शक्ति भएको समेत बताएका छन् ।
प्रतिनिधिको एउटा निर्णय र छनोटले पार्टी कस्तो बनाउने भन्ने कुरा तय हुने उनले उल्लेख गरेका छन् ।
‘तपाईले आज छनोट गरेर पठाउने महाधिवेशन प्रतिनिधिले नै मंसिर २४ गते देखि हुने नेपाली कांग्रेसको १४ औं महाधिवेशनमा पार्टीको नेतृत्व छनोट गर्नेछ। आज सहि निर्णय गर्न सक्यौं भने मात्र पार्टीले सही गति लिनेछ। पार्टीलाई नवजीवन दिने कामको आरम्भ तपाईहरूबाट हुदैछ। तपाईको निर्णय पार्टीको सर्वोत्तम हित र नवनिर्माणको लागि हुनेछ भन्ने कुरामा विश्वस्त छु।’ विज्ञप्तिमा भनिएको छ ।
