निर्देशक सुदर्शन थापाले नयाँ चलचित्र निर्देशनको घोषणा गरेका छन् । अभिनेता समेत रहेका सुदर्शनले ‘चंखे शंखे पंखे’ नामको छैठौं चलचित्र निर्देशनको घोषणा गरका हुन् । राजधानीमा एक औपचारिक कार्यक्रमका बिच सुदर्शनले आफ्नै मुख्य भूमिका रहने चलचित्र निर्देशनको घोषणा गरेका हुन् । चलचित्रमा सुदर्शन शंखेको भूमिकामा देखिने छन् । सुदर्शनको अभिनय तथा स्व आलोक नेम्वाङले निर्देशन गरेको चलचित्र अझै पनि आउँदो फाल्गुन १५ देखि प्रर्दशन हुँदैछ ।
कमेडी र राष्ट्र प्रेम झल्कने चंखे शंखे पंखेमा चंखेको भूमिकामा सुवास थापा र शंखेको भूमिकामा नव कलाकार प्रेम पुरी देखिनेछन् । यहि बिहीवारदेखि छायाँकन सुरु हुने चलचित्रलाई राजेश श्रेष्ठले खिच्नेछन् । तारा प्रकाश लिम्बुको संगीत रहने गीतलाई गोविन्द राईले नृत्य निर्देशन गर्दैछन् । नयाँ निर्माता सन्तोष सेन ठकुरीको लगानी रहने यो चलचित्रमा अष्ट महर्जनको द्धन्द रहनेछ ।
३ बेरोजगार यूवाको कथामा बन्न लागेको यो चलचित्रले आत्महत्याको बिषयलाई पनि उठान गर्ने जानकारी निर्माणपक्षले दिएको छ । कार्यक्रममा बोल्दै निर्देशक तथा कलाकार सुदर्शन थापाले नेपालमा बढ्दै गएको आत्महत्याको कथालाई चलचित्रमा देखाउने बताए । रामशरण पाठकले कथा लेखेको यो चलचित्रमा पूजा शर्मा, नन्दिता केसी, प्रमोद अग्रहरी, राजाराम पौडेल, श्याम राई, ध्रुव कोइराला र रबिन्द्र खड्काको पनि मुख्य भूमिका रहने छ ।
