काठमाडौँ, भदौ ५ । साफ यु–१९ च्याम्पियनसिप फुटबलअन्तर्गत् शनिबार भएको खेलमा बंगलादेशले भुटानलाई २–० ले हराएको छ । हारसँगै भूटान प्रतियोगिताको समूहचरणबाटै बाहिरिएको छ ।
भुटानको लगातार दोस्रो हारले नेपाल र बंगलादेश भने समूह ’ए’बाट एक खेल अगावै सेमिफाइनलमा पुगेका छन् । नेपाल र बंगालादेशको समान ३÷३ अंक छ । दुवैको गोल अन्तर पनि समान रहेको छ । यसअघि, उद्घाटन खेलमा भूटान नेपालसँग ३–० ले पराजित भएको थियो ।
सातदोबाटोस्थित एन्फा कम्प्लेक्स मैदानमा भएको खेलमा बंगलादेशका लागि रोहित सरकारले ४१औँ मिनेटमा पहिलो गोल गरे । दोस्रो गोल मनाफ रब्बीले ४३औँ मिनेटमा गरे । पहिलो हाफमा २–० ले अग्रता लिएको बंगलादेशले दोस्रो हाफमा गोल गर्न सकेन ।
समूहको विजेता भने आगामी सोमबार नेपाल र बंगलादेशबीच हुने खेलले निर्धारण गर्छ ।
आइतबार भारत र अफगानिस्तानबीच प्रतिस्पर्धा हुनेछ । अफगानिस्तानले यसअघि शुक्रबार भएको खेलमा माल्दिभ्सलाई ३–१ ले पराजित गरेको छ भने भारतको यो पहिलो खेल हुनेछ ।
