एजेन्सी । रुस र युक्रेनबीचको युद्धको आज १३ औं दिन रहेको छ । रुसी सेनाले लगातार युक्रेनका विभिन्न सहरलाई निशाना बनाएको छ ।
यसै क्रममा सुमी सहरको आवासीय क्षेत्रमा मिसाइल आक्रमण भएको थियो, जसमा दुई बालबालिकासहित १० जनाको मृत्यु भएको बताइएको छ ।
यसैबीच, युक्रेनले रुसको आक्रमणमा हालसम्म २०३ विद्यालय र ३४ अस्पताल ध्वस्त भएको दाबी गरेको छ । यसबाहेक १२ हजारभन्दा बढी रुसी सैनिकको पनि ज्यान गएको उसले दाबी गरेको छ । ३०३ रुसी ट्याङ्क र ४८ लडाकु विमान पनि ध्वस्त भएको दाबी युक्रेनले गरेको छ ।
मिडिया रिपोर्टका अनुसार रुसले युक्रेनको राजधानी किभ कब्जा गर्न कमाण्डो अपरेशनको तयारी गरिरहेको छ । दुई देशबीच युद्धविरामका लागि तेस्रो चरणको वार्ता भएको थियो, जुन निष्कर्षविहीन रह्यो । सोमबार बेलारुसमा भएको वार्तामा युक्रेनमा युद्धका बेला मानिसलाई बाहिर निकाल्न मानवीय करिडोर निर्माण गर्ने सहमति बन्न सकेको थिएन ।
रुसी बमबारीका कारण मानिसहरु आफ्नो ज्यान बचाउन युक्रेन छाडिरहेका छन् । जसमा बालबालिका, वृद्धदेखि बिरामी रहेका छन् ।
