काठमाडौं । जिल्ला प्रहरी परिसर काठमाडौंले बडादसैँ, तिहार र छठ पर्वलाई लक्षित गर्दै ४५ दिने विशेष सुरक्षा योजना लागू गरेको छ । चाडपर्वका समयमा हुन सक्ने आपराधिक गतिविधि तथा सवारी दुर्घटना नियन्त्रण गर्दै राजधानीको सुरक्षा व्यवस्था सुदृढ बनाउने उद्देश्यले असोज १६ गतेदेखि कात्तिक ३० गतेसम्मका लागि योजना लागू गरिएको हो ।
काठमाडौंमा आयोजित पत्रकार सम्मेलनमा प्रहरी उपरीक्षक दानबहादुर थापा र प्रहरी वरिष्ठ उपरीक्षक दिलीप घिमिरेले विगतका चाडपर्वमा भएका आपराधिक घटनाको विश्लेषण तथा सुरक्षा जोखिमको अध्ययन गरी यस वर्षको सुरक्षा योजना तयार पारिएको जानकारी दिनुभयो ।
योजनाअन्तर्गत काठमाडौंका मुख्य बजार, बसपार्क तथा संवेदनशील क्षेत्रमा ३ हजार ५ सय ६ जना प्रहरी परिचालन गरिनेछ । चाडपर्वका समयमा घर तथा व्यापारिक प्रतिष्ठान खाली हुने, बजारमा भीडभाड बढ्ने र मानिसको आवतजावत बढ्ने भएकाले चोरी, लुटपाट, ठगी, जुवातास, गुण्डागर्दी तथा सवारी दुर्घटना नियन्त्रणमा विशेष ध्यान दिइने प्रहरीले जनाएको छ ।
प्रहरीले यात्रुको सहजताका लागि हेल्प डेस्क तथा नागरिक सहायता कक्ष स्थापना गर्ने भएको छ । त्यस्तै, सीसीटीभीमार्फत निरन्तर निगरानी गर्ने, टिकट काउन्टरमा हुने ठगी नियन्त्रण गर्ने तथा क्षमताभन्दा बढी यात्रु बोक्ने सवारीसाधनमाथि निगरानी बढाउने रणनीति बनाइएको छ ।
प्रहरी उपरीक्षक थापाका अनुसार योजनाको मुख्य उद्देश्य चाडपर्वका समयमा हुन सक्ने आपराधिक गतिविधि तथा दुर्घटना रोकथाम र नियन्त्रण गर्नु, घटना भए तत्काल उद्धार तथा प्रतिकार्य गर्नु, नागरिकलाई सुरक्षाको अनुभूति दिलाउनु र काठमाडौं उपत्यकाबाट बाहिरिने यात्रुको आवागमन सुरक्षित तथा सहज बनाउनु हो ।
प्रहरी वरिष्ठ उपरीक्षक घिमिरेले ‘दसैँ कसैका लागि दशा नबनोस्’ भन्ने मूल मर्मका साथ सुरक्षा योजना कार्यान्वयनमा ल्याइएको बताउनुभयो । उहाँले चाडपर्वका समयमा आपराधिक समूह सक्रिय हुनसक्ने भएकाले नागरिकलाई समेत सतर्क रहन आग्रह गर्नुभयो ।
प्रहरीले विगतका घटनाको ‘क्राइम प्याटर्न’ विश्लेषण गरी प्रविधिमैत्री सुरक्षा रणनीति अपनाएको जनाएको छ । भीडभाड हुने स्थानमा प्रहरीको उपस्थिति बढाउनुका साथै सामाजिक सञ्जाल र समुदाय–प्रहरी साझेदारी कार्यक्रममार्फत सचेतनामूलक सूचना प्रवाह गरिनेछ ।
चाडपर्वका क्रममा आपराधिक गतिविधिमा संलग्न व्यक्तिलाई तत्काल कानुनी दायरामा ल्याउने तथा आकस्मिक घटनामा द्रुत प्रतिकार्यका लागि प्रहरी परिचालनलाई थप प्रभावकारी बनाइने प्रहरीले जनाएको छ ।
