काठमाडौँ । अर्थमन्त्री जनार्दन शर्माले राजस्वले चालु खर्च धान्न कठिन भएको बताउनुभएको छ । नेपाल आर्थिक पत्रकार सङ्घ (नाफिज) ले बुधबार आयोजना गरेको ‘आर्थिक पुनरुत्थानमा सार्वजनिक निजी साझेदारी’ विषयक कार्यक्रममा उहाँले यस्तो बेलामा निजी क्षेत्रले निस्वार्थभावसहित आफ्नो प्राथमिकता राष्ट्र निर्माण र आर्थिक विकासमा केन्द्रित गर्नुपर्ने बताउनुभयो ।
उहाँले भन्नुभयो, “सरकारले अहिलेको बजेट सानो भएकाले हामीले बनाएका संरचनाको खर्च गर्ने प्रवृत्ति हेर्दा चालु खर्च धान्न पनि मुस्किल छ, नेपालको बजेट र बजेट प्रणाली नै समस्याग्रस्त अवस्थामा छ, राजस्वले चालु खर्च धान्न कठिन छ, त्यसैले निजी क्षेत्रको लगानी राष्ट्र निर्माण र आर्थिक विकासमा आधारित हुनुपर्छ ।” उहाँले कोभिडपछिको आर्थिक पुनरुत्थानमा निजी क्षेत्रलाई आवश्यक सहुलियत पूरा गर्ने सरकारको प्रयास जारी रहेको बताउनुभयो ।
नेपाल राष्ट्र बैंकका गभर्नर महाप्रसाद अधिकारीले सीसीडी रेसियो हटाएर बजारमा तरलता अभाव नभएको भन्दै सीसीडी रेसियो र तरलतालाई तुलना गर्न नहुनेमा जोड दिनुभयो । तरलता लामो समयदेखिको समस्या भएको उहाँको भनाइ थियो ।
गभर्नर अधिकारीले अहिले विश्व अर्थतन्त्र ५ दशमलव ९ प्रतिशतले विस्तार हुने प्रक्षेपण भइरहेको उल्लेख गर्दै नेपालमा पनि कोभिड पछि अर्थतन्त्रमा राम्रो सुधार देखिएको बताउनुभयो । नेपालमा मूल्यवृद्धि ६ दशमलव ५ प्रतिशत रहने अनुमान गरिएको उहाँले जानकारी दिनुभयो ।
