काठमाडौँ। नेपाल इन्जिनियर्स एशोसिएशनले भोटेकोशी नदीमा आएको बाढीका कारण ज्यान गुमाएका इन्जिनियरहरू तथा अन्य आम नागरिकको स्मृतिमा दीप प्रज्वलन गरेको छ ।
सोमवार साँझ काठमाडौंको माईतीघर मण्डलामा एक कार्यक्रमको आयोजना गरी उक्त प्राकृतिक विपत्तिमा परी ज्यान गुमाउनेहरूप्रति भावपूर्ण श्रद्धाञ्जली अर्पण गरिएको हो ।
गत भदौ १० गते भोटेकोशी नदीमा आएको भीषण बाढीका कारण ठूलो परिमाणमा मानवीय क्षति भएको थियो । उपलब्ध तथ्याङ्कअनुसार बाढीमा परेर हालसम्म १ हजार ३ सय ५५ जनाले ज्यान गुमाएका छन् भने ५ हजार व्यक्तिहरू अझै बेपत्ता रहेका छन्।
सोही विनाशकारी विपत्तिमा परी ज्यान गुमाउने तथा बेपत्ता भएकाहरूको सम्मान र सम्झनामा एशोसिएशनले यो स्मृति कार्यक्रम आयोजना गरेको हो ।
बाढीमा परी ज्यान गुमाएका प्राविधिक जनशक्ति (इन्जिनियर) लगायत सम्पूर्ण सर्वसाधारणप्रति ऐक्यवद्धता जनाउँदै आयोजना गरिएको उक्त कार्यक्रममा एशोसिएशनका पदाधिकारी, इन्जिनियर तथा सर्वसाधारणको उपस्थिति रहेको थियो ।
दीप प्रज्वलनका माध्यमबाट मृतकको आत्माको शान्तिको कामना गर्दै बेपत्ताहरूको अवस्थाप्रति सहानुभूति प्रकट गरिएको एशोसिएशनले जनाएको छ । –न्युज एजेन्सी नेपाल
