एजेन्सी । करोडौंको मुहारमा मुस्कान ल्याउने कमेडी किंग कपिल शर्मासँग फ्यानहरू आक्रोशित बन्दै ट्विटरमा कपिलको आलोचना गरिरहेका छन् ।
‘द कपिल शर्मा शो’ ट्विटरमा निकै ट्रोल भइरहेको छ । मानिसहरूले कपिलको शो बहिष्कार गर्न माग गरिरहेका छन्।
यस्तो छ घटनाक्रम…
विवेक अग्निहोत्रीको फिल्म ‘द कश्मीर फाइल्स’ ट्रेलर सार्वजनिक भएदेखि नै चर्चामा छ । फिल्ममा कश्मीरी पण्डितहरुको संघर्ष देखाइएको छ । जब एक फ्यानले विवेक अग्निहोत्रीलाई आफ्नो फिल्म ‘द कपिल शर्मा शो’ मा प्रमोशन गर्नुपर्छ भनी सोध्दा उनले कपिल शर्माको शोमा को को उपस्थित हुने भन्ने निर्णय आफूले नगर्ने जवाफ दिए । त्यसयता यो मामिलाले उग्र रुप लियो ।
विवेक अग्निहोत्रीले फ्यानको कमेन्टको जवाफ दिँदै कपिलको शोमा को जाने भन्ने निर्णय कपिल र निर्माताले गर्ने बताउँदै आफ्नो फिल्ममा कुनै पनि ठूला स्टार नभएकाले प्रमोशन अस्वीकार गरिएको उनले चिन्ता व्यक्त गरे ।
विवेक अग्निहोत्रीको यो दाबीपछि सामाजिक सञ्जालमा कपिल शर्माको चर्को विरोध भइरहेको छ । कमेडियन कपिल शर्मा ट्विटरमा ट्रोल भइरहेका छन् । यति मात्र होइन, प्रयोगकर्ताहरूले शो बहिष्कार गर्न पनि माग गरिरहेका छन्। निकै ऐतिहासिक र महत्वपूर्ण मुद्दा उठाएको यो फिल्मको प्रमोशन नगर्दा केही मानिसहरु आक्रोशित भएका छन् ।
