धनगढी, १४ कात्तिक (रासस) ः मुम्बइ भ्रमणमा रहेको धनगढी क्रिकेट एकेडेमी (डिसिए) आज भएको अन्तिम मैत्रीपूर्ण खेलमा मुम्बइको भिवन्डी गाउँको टिमसँग पराजित भएको छ ।
मुम्बइको कल्याणस्थित भिवन्डी गाउँको टिमले डिसिएलाई दुई विकेटले पराजित गरेको हो । ३० ओभरको खेलमा डिसिएले दिएको १६७ रनको लक्ष्य भिवन्डीले अन्तिम एक ओभरको खेल बाँकी रहँदा आठ विकेट गुमाएर पूरा ग¥यो ।
मैत्रीपूर्ण खेल खेल्नका लागि यही कात्तिक ४ गते मुम्बइ गएको डिसिएले विभिन्न क्लबसँंग छ वटा एकदिवसीय र एउटा टी–२० गरी सात अभ्यास खेल खेलेकामा तीनमा जित र चार खेलमा पराजय व्यहोरेको छ ।
सोनाले क्रिकेट मैदानमा आज टस जितेर ब्याटिङ रोजेको डिसिएले निर्धारित ३० ओभर खेल्दै नौ विकेटको क्षतिमा १६६ रन बनाएको थियो । डिसिएका लागि सोनु मण्डलले तीन छक्का र तीन चौकाको मद्दतले अर्धशतक पूरा गर्दै नटआउट ६८ रन बनाए ।
कप्तान सुवोध ऐरले ब्याटिङ गर्दै दुई छक्का र दुई चौकाको मद्दतले छ बलमा २० रन बनाए । किरण नाथले १९ रनको योगदान गरे । डिसिएका अरु ब्याट्सम्यान रन आउट भएका थिए ।
बलिङ गर्दै भिवन्डीका सोेहेब गौरीले सर्वाधिक चार र खसिद अन्सारीले दुई विकेट प्राप्त गरे । जवाफी ब्याटिङमा उत्रेको भिवन्डीले अन्तिम ओभर बाँकी रहँदा जित हात पारेको थियो ।
डिसिएका १० वर्षीय खेलाडी सुवोध तिवारीले तीन विकेट लिए पनि खराब फिल्डिङ र चार क्याच छोडेका कारण डिसिएले पराजय व्यहोर्नु प¥यो । यस्तै सोनुले दुई, कुश मण्डलले दुई र सन्दिप आउजीले एक विकेट हात पारेका थिए ।
